தமிழகத்தில் மேலும் 2 நாட்கள் வெப்ப அலை: 'ஆரஞ்சு அலர்ட்' தொடர்கிறது
: தமிழகத்தின் பல்வேறு மாவட்டங்களில் கடும் வெப்பம் நீடித்து வரும் நிலையில், இன்றும் நாளையும் வெப்ப அலை தாக்கம் தொடரும் என சென்னை வானிலை ஆய்வு மையம் அறிவித்துள்ளது
சென்னை: தமிழகத்தின் பல்வேறு மாவட்டங்களில் கடும் வெப்பம் நீடித்து வரும் நிலையில், இன்றும் நாளையும் வெப்ப அலை தாக்கம் தொடரும் என சென்னை வானிலை ஆய்வு மையம் அறிவித்துள்ளது. இதனால் மாநிலத்தின் பல பகுதிகளுக்கு வழங்கப்பட்டிருந்த 'ஆரஞ்சு அலர்ட்' எச்சரிக்கை மேலும் இரண்டு நாட்களுக்கு நீட்டிக்கப்பட்டுள்ளது.
வானிலை ஆய்வு மையம் வெளியிட்டுள்ள தகவலின்படி, தமிழக கடலோரப் பகுதிகள், உள்மாவட்டங்களின் பெரும்பாலான இடங்கள், புதுச்சேரி மற்றும் காரைக்கால் பகுதிகளில் இயல்பை விட 2 முதல் 4 டிகிரி செல்சியஸ் வரை வெப்பநிலை அதிகரிக்கக்கூடும். இதன் காரணமாக வெப்பம் தொடர்பான உடல்நல பாதிப்புகள் ஏற்படும் அபாயம் உள்ளதாக எச்சரிக்கப்பட்டுள்ளது.
இன்று திருப்பத்தூர், வேலூர், ராணிப்பேட்டை, திருவண்ணாமலை, காஞ்சிபுரம், கள்ளக்குறிச்சி, கிருஷ்ணகிரி, தர்மபுரி, சேலம், நாமக்கல், கரூர், ஈரோடு, திருச்சி, அரியலூர், பெரம்பலூர், சிவகங்கை, விருதுநகர், திண்டுக்கல் மற்றும் மதுரை உள்ளிட்ட மாவட்டங்களில் வெப்ப அலை நிலவ வாய்ப்புள்ளதாக தெரிவிக்கப்பட்டுள்ளது.
நாளை விருதுநகர், சிவகங்கை, மதுரை, திண்டுக்கல், கரூர், நாமக்கல் மற்றும் ஈரோடு மாவட்டங்களின் சில பகுதிகளில் வெப்ப அலை தொடரும் என கணிக்கப்பட்டுள்ளது.
அதே நேரத்தில், மேற்கு தொடர்ச்சி மலையை ஒட்டிய மாவட்டங்களில் இன்று லேசான மழையும், நாளை ஒரு சில இடங்களில் மிதமான மழையும் பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.
மேலும், வடமேற்கு வங்கக்கடலில் ஒடிஷா–மேற்கு வங்கக் கடற்கரையை ஒட்டிய பகுதியில் காற்றழுத்த தாழ்வு பகுதி உருவாகியுள்ளது. அதன் நகர்வை தொடர்ந்து கண்காணித்து வருவதாகவும், அதனைத் தொடர்ந்து தேவையான வானிலை அறிவிப்புகள் வெளியிடப்படும் என்றும் தெரிவிக்கப்பட்டுள்ளது.
வெப்ப அலை நீடிக்கும் சூழலில், நண்பகல் நேரங்களில் தேவையற்ற வெளிப்புற பயணங்களைத் தவிர்க்கவும், போதிய அளவு தண்ணீர் மற்றும் திரவ உணவுகளை அருந்தவும், குழந்தைகள், முதியவர்கள் மற்றும் உடல்நலக் குறைபாடுகள் உள்ளவர்கள் கூடுதல் முன்னெச்சரிக்கையுடன் இருக்கவும் பொதுமக்களுக்கு அறிவுறுத்தப்பட்டுள்ளது.
