சென்னை: நாட்டின் 80வது சுதந்திர தினம் நாளை (ஆகஸ்ட் 15) கொண்டாடப்பட உள்ள நிலையில், சென்னை புனித ஜார்ஜ் கோட்டை கொத்தளத்தில் முதல்வர் விஜய் முதன்முறையாக தேசியக் கொடியை ஏற்றி வைத்து உரையாற்ற உள்ளார்.
சுதந்திர தின விழாவில் பல்வேறு துறைகளில் சிறப்பாக செயல்பட்டவர்களுக்கு விருதுகளையும் முதல்வர் விஜய் வழங்க உள்ளார். இதற்கான ஏற்பாடுகள் சென்னை கோட்டை கொத்தளம் பகுதியில் தீவிரமாக நடைபெற்று வருகின்றன.
காலை 8.45 மணிக்கு கொடியேற்றம்
காலை 8.30 மணிக்கு கோட்டை கொத்தளம் பகுதிக்கு வரும் முதல்வர் விஜய்யை தலைமைச் செயலர் வரவேற்று, காவல் துறை அதிகாரிகளை அறிமுகம் செய்து வைக்கிறார். தொடர்ந்து காவல் துறையின் பல்வேறு பிரிவுகள் அளிக்கும் அணிவகுப்பு மரியாதையை முதல்வர் பார்வையிடுகிறார்.
இதையடுத்து காலை 8.45 மணிக்கு கோட்டை கொத்தளத்தில் தேசியக் கொடியை ஏற்றி வைத்து முதல்வர் விஜய் மரியாதை செலுத்துகிறார். பின்னர் நடைபெறும் விழாவில் பல்வேறு விருதுகள் வழங்கப்பட உள்ளன.
வழங்கப்படும் முக்கிய விருதுகள்
- தகைசால் தமிழர் விருது
- அப்துல் கலாம் விருது
- துணிவு மற்றும் சாகசத்துக்கான கல்பனா சாவ்லா விருது
- முதல்வரின் நல்லாளுமை விருது
- மாற்றுத்திறனாளிகளுக்காக சிறப்பாக பணியாற்றியவர்களுக்கான விருதுகள்
- சமூகநல சேவை மற்றும் கூட்டுறவு வங்கிகளுக்கான விருதுகள்
- சிறந்த மாநகராட்சிகள், நகராட்சிகள் மற்றும் பேரூராட்சிகளுக்கான விருதுகள்
5 அடுக்கு பாதுகாப்பு
சுதந்திர தின விழாவையொட்டி சென்னை புனித ஜார்ஜ் கோட்டையைச் சுற்றி 5 அடுக்கு பாதுகாப்பு ஏற்பாடுகள் செய்யப்பட்டுள்ளன. சென்னை விமான நிலையத்திலும் பாதுகாப்பு பலப்படுத்தப்பட்டுள்ளது.
சென்னை சென்ட்ரல், எழும்பூர் உள்ளிட்ட ரயில் நிலையங்கள், மெட்ரோ ரயில் நிலையங்கள், வணிக வளாகங்கள், கடற்கரை பகுதிகள் மற்றும் வழிபாட்டுத் தலங்களில் போலீஸ் கண்காணிப்பு தீவிரப்படுத்தப்பட்டுள்ளது.
மாநிலம் முழுவதும் முக்கிய இடங்களில் வாகனச் சோதனை மற்றும் கண்காணிப்பு பணிகள் நடைபெற்று வருகின்றன. விடுதிகள் மற்றும் ஓட்டல்களிலும் போலீஸார் சோதனை நடத்தி வருகின்றனர்.
தமிழகம் முழுவதும் 1 லட்சம் போலீஸார் பாதுகாப்பு
சென்னை பெருநகர காவல் எல்லை முழுவதும் நான்கு சக்கர மற்றும் இருசக்கர ரோந்து வாகனங்கள் மூலம் போலீஸார் தீவிர ரோந்துப் பணியில் ஈடுபட்டுள்ளனர். முக்கிய சாலைகளில் தடுப்புகள் அமைக்கப்பட்டு வாகனத் தணிக்கையும் மேற்கொள்ளப்படுகிறது.
சென்னையில் சுமார் 10 ஆயிரம் போலீஸார் உட்பட தமிழகம் முழுவதும் ஒரு லட்சம் போலீஸார் பாதுகாப்பு மற்றும் கண்காணிப்புப் பணியில் ஈடுபடுத்தப்பட்டுள்ளனர்.
