தேர்தலுக்கு முன் 21 மாநிலங்களில் பொது சிவில் சட்டம்: அமித் ஷா

நவி மும்பை: 2029-ம் ஆண்டு நடைபெற உள்ள மக்களவைத் தேர்தலுக்கு முன்பாக, பாஜக மற்றும் அதன் கூட்டணி கட்சிகள் ஆட்சி செய்யும் 21 மாநிலங்களில் பொது சிவில் சட்டம் அமல்படுத்தப்படும் என்று மத்திய உள்துறை அமைச்சர் அமித் ஷா தெரிவித்துள்ளார்.

நவி மும்பையில் செய்தியாளர்களிடம் பேசிய அமித் ஷா, ஏற்கனவே நாட்டின் பல மாநிலங்களில் பொது சிவில் சட்டம் நடைமுறைக்கு வந்துள்ளதாக தெரிவித்தார். பொது சிவில் சட்டத்தை அமல்படுத்திய முதல் மாநிலமாக உத்தரகண்ட் திகழ்வதாகவும், மற்ற மாநிலங்களுக்கு அது முன்னுதாரணமாக இருப்பதாகவும் அவர் குறிப்பிட்டார்.

21 மாநிலங்களில் பொது சிவில் சட்டம்

2029-ம் ஆண்டு மக்களவைத் தேர்தல் நடைபெறுவதற்கு முன்பாக, பாஜக மற்றும் அதன் கூட்டணி கட்சிகள் ஆட்சி செய்யும் 21 மாநிலங்களில் பொது சிவில் சட்டத்தை நடைமுறைப்படுத்த நடவடிக்கை எடுக்கப்படும் என அமித் ஷா கூறினார்.

திருமணம், விவாகரத்து உள்ளிட்ட தனிப்பட்ட விவகாரங்களை நிர்வகிப்பதற்கான பொதுவான சட்டக் கட்டமைப்பு, பாலின சமத்துவம், சமூக நீதி மற்றும் அரசியலமைப்பு நெறிமுறைகளை மேம்படுத்தும் என்றும் அவர் தெரிவித்தார்.

முத்தலாக் ஒழிப்பு குறித்து அமித் ஷா கருத்து

முத்தலாக் நடைமுறை ஒழிக்கப்பட்டதன் மூலம் முஸ்லிம் பெண்களின் உரிமைகள் வலுப்படுத்தப்பட்டுள்ளதாகவும் மத்திய உள்துறை அமைச்சர் தெரிவித்தார்.

குற்றவியல் நீதித்துறையில் சீர்திருத்தம்

பாரதிய நியாய சன்ஹிதா, இந்தியாவின் குற்றவியல் நீதித்துறையை நவீனப்படுத்துவதற்கான முக்கியமான சீர்திருத்தமாக அமைந்துள்ளதாக அமித் ஷா கூறினார்.

பல மாநிலங்களில் குற்ற வழக்குகளில் தண்டனை வழங்கும் விகிதம் ஒரே ஆண்டில் 30 சதவீதம் அதிகரித்துள்ளதாகவும் அவர் தெரிவித்தார். மேலும், மூன்று ஆண்டுகளுக்குள் நீதி வழங்கும் நடைமுறையை விரிவுபடுத்துவதற்கான பணிகள் மேற்கொள்ளப்பட்டு வருவதாகவும் குறிப்பிட்டார்.

காஷ்மீர், நக்சலிசம் குறித்து பேச்சு

காஷ்மீருக்கான 370 மற்றும் 35ஏ சட்டப்பிரிவுகள் ரத்து செய்யப்பட்டதன் மூலம் எந்தவித வன்முறையும் இன்றி காஷ்மீரின் முழுமையான ஒருங்கிணைப்பு உறுதி செய்யப்பட்டுள்ளதாக அமித் ஷா தெரிவித்தார்.

மேலும், சுமார் 50 ஆண்டுகளாக நீடித்த நக்சலைட் ஆதிக்கம் முடிவுக்கு கொண்டு வரப்பட்டுள்ளதாகவும் அவர் கூறினார். வடகிழக்கு மாநிலங்களில் 14-க்கும் மேற்பட்ட அமைதி ஒப்பந்தங்கள் கையெழுத்தாகியுள்ளதாகவும் தெரிவித்தார்.

பயங்கரவாதத்துக்கு எதிராக பூஜ்ய சகிப்புத்தன்மை

பயங்கரவாதத்திற்கு எதிரான மத்திய அரசின் பூஜ்ய சகிப்புத்தன்மை கொள்கைக்கு சர்ஜிகல் ஸ்டிரைக் மற்றும் ஆபரேஷன் சிந்தூர் போன்ற நடவடிக்கைகள் சான்றுகளாக இருப்பதாக அமித் ஷா தெரிவித்தார்.