சென்னை: சென்னையில் பெய்த அதிகனமழையைத் தொடர்ந்து, மாநகராட்சி சார்பில் மேற்கொள்ளப்பட்ட தீவிர மீட்பு நடவடிக்கைகளால் 22 சுரங்கப்பாதைகளிலும் தேங்கியிருந்த மழைநீர் அகற்றப்பட்டு, போக்குவரத்து சீராகியுள்ளது. மழையால் பாதிக்கப்படக்கூடிய பகுதிகளில் வசிக்கும் மக்களுக்காக 9 நிவாரண மையங்களும் திறக்கப்பட்டுள்ளன.
பாரிமுனையில் 36.3 செ.மீ. மழை
தமிழக அரசு வெளியிட்ட செய்திக்குறிப்பின்படி, கடந்த 24 மணி நேரத்தில் சென்னையில் 6 இடங்களில் 20 செ.மீ.க்கும் அதிகமான அதி கனமழையும், 12 இடங்களில் 11.5 செ.மீ.க்கும் அதிகமான மிக கனமழையும் பதிவாகியுள்ளது. அதிகபட்சமாக பாரிமுனையில் 36.3 செ.மீ. மழை பதிவாகியுள்ளது.
15 ஆயிரத்துக்கும் மேற்பட்ட பணியாளர்கள் மீட்புப் பணி
கனமழையைத் தொடர்ந்து இரவு முழுவதும் 15 ஆயிரத்துக்கும் மேற்பட்ட களப்பணியாளர்கள் மீட்பு மற்றும் மழைநீர் அகற்றும் பணிகளில் ஈடுபடுத்தப்பட்டனர். மழைநீரை வெளியேற்றுவதற்காக 650 மின் மோட்டார் பம்புகள் மற்றும் டிராக்டர்களில் பொருத்தப்பட்ட பம்புகள் பயன்படுத்தப்பட்டன.
அமைச்சர்கள், சட்டமன்ற உறுப்பினர்கள் மற்றும் உயர் அலுவலர்கள் கள ஆய்வு மேற்கொண்டு, மழைநீர் அகற்றும் பணிகளையும் மீட்பு நடவடிக்கைகளையும் ஒருங்கிணைத்தனர்.
22 சுரங்கப்பாதைகளிலும் தண்ணீர் அகற்றம்
முக்கிய பேருந்து வழித்தடச் சாலைகள் மற்றும் மழைநீர் தேங்கியிருந்த பெரும்பாலான தெருக்களில் தண்ணீர் அகற்றப்பட்டுள்ளதாக அரசு தெரிவித்துள்ளது. தாழ்வான சில பகுதிகளில் மட்டும் மழைநீரை வெளியேற்றும் பணிகள் தொடர்ந்து நடைபெற்றன.
மழைநீர் தேங்கியிருந்த அனைத்து சுரங்கப்பாதைகளிலும் தண்ணீர் அகற்றப்பட்டு, காலை 6 மணிக்குள் அவை போக்குவரத்துக்காகத் திறக்கப்பட்டன. இதனால் சென்னையில் உள்ள 22 சுரங்கப்பாதைகளிலும் போக்குவரத்து சீரடைந்துள்ளது.
9 நிவாரண மையங்கள் திறப்பு
வெள்ள பாதிப்புக்கு உள்ளாகக்கூடிய பகுதிகளில் மீட்புப் பணிகளை மேற்கொள்ள தேசிய பேரிடர் மீட்புப் படையின் ஒரு குழுவும், தமிழ்நாடு பேரிடர் மீட்புப் படையின் 4 குழுக்களும் ஈடுபடுத்தப்பட்டன.
பொதுமக்களின் பாதுகாப்புக்காக 9 நிவாரண மையங்கள் திறக்கப்பட்டுள்ளன. தாழ்வான பகுதிகளில் வசிக்கும் மக்களுக்கு உணவும் வழங்கப்பட்டு வருகிறது.
உயிரிழப்புகள் இல்லை என அரசு தகவல்
கடுமையான மழைப்பொழிவு இருந்தபோதிலும், மழை காரணமாக உயிரிழப்புகளோ பெரிய அளவிலான விபத்துகளோ ஏற்படவில்லை என்றும், நிலைமை கட்டுப்பாட்டில் இருப்பதாகவும் தமிழக அரசு தெரிவித்துள்ளது. மாநகராட்சி அலுவலர்கள் மற்றும் பணியாளர்களின் ஒருங்கிணைந்த நடவடிக்கைகளால் காலை நேரத்திற்குள் சென்னையில் இயல்பு நிலை மீண்டும் கொண்டுவரப்பட்டதாகவும் அரசு செய்திக்குறிப்பில் கூறப்பட்டுள்ளது.
