மேட்டூர்: டெல்டா பாசனத்துக்காக மேட்டூர் அணையிலிருந்து தண்ணீர் திறந்து வைத்த நிகழ்ச்சிக்குப் பிறகு, முதல்வர் விஜய் சின்னக்காவூர் பகுதியில் உள்ள விவசாயி குடும்பத்தை நேரில் சந்தித்தார். அப்போது நடந்த நெகிழ்ச்சியான சம்பவம் அங்கிருந்த மக்களின் கவனத்தை ஈர்த்தது.
மேட்டூரை அடுத்த சின்னக்காவூர் பகுதியில் வசிக்கும் விவசாயி குடும்பத்தினரை சந்தித்த முதல்வர் விஜய், அவர்களிடம் விவசாயப் பணிகள் மற்றும் வாழ்வாதாரம் குறித்து கேட்டறிந்தார். பின்னர் அந்தக் குடும்ப உறுப்பினர்களுடன் சிறிது நேரம் கலந்துரையாடினார்.
அப்போது அங்கிருந்த விவசாயிகள் மற்றும் அவர்களது குடும்பத்தினருக்கு வேட்டி, சேலை உள்ளிட்டவற்றை வழங்கினார். முதல்வரின் திடீர் வருகையால் அந்தக் குடும்பத்தினர் மகிழ்ச்சி அடைந்தனர்.
மூதாட்டிக்கு கூலிங் கிளாஸ் பரிசு
அந்தக் குடும்பத்தைச் சேர்ந்த மூதாட்டி ஒருவர் முதல்வர் விஜய்யின் கையைப் பிடித்து அன்புடன் வாழ்த்து தெரிவித்தார். இந்த நெகிழ்ச்சியான தருணத்தில், தான் அணிந்திருந்த கூலிங் கிளாஸை கழற்றிய முதல்வர் விஜய், அதை மூதாட்டிக்கு அணிவித்தார்.
இதையடுத்து, முதல்வரும் மூதாட்டியும் கூலிங் கிளாஸ் அணிந்தபடி பொதுமக்களை நோக்கி கையசைத்தனர். இந்தக் காட்சி அங்கிருந்தவர்களிடையே மகிழ்ச்சியையும் உற்சாகத்தையும் ஏற்படுத்தியது.
விவசாயி குடும்பத்துடன் சந்திப்பு
விவசாயி வீட்டுக்குச் சென்ற முதல்வர் விஜய், தோட்டப் பகுதியையும் பார்வையிட்டு விவசாய நடவடிக்கைகள் குறித்து கேட்டறிந்தார். பின்னர் குடும்ப உறுப்பினர்கள் அனைவரும் முதல்வரின் கையைப் பிடித்தபடி அவரை பிரதான சாலை வரை வழியனுப்பினர்.
மேட்டூர் அணையில் இருந்து டெல்டா பாசனத்துக்காக தண்ணீர் திறக்கப்பட்ட நிகழ்ச்சியைத் தொடர்ந்து, முதல்வர் விஜய்யின் இந்த கிராமச் சந்திப்பு கவனம் பெற்றுள்ளது.
சாலையோர மக்களிடமும் நலம் விசாரிப்பு
மேட்டூரில் இருந்து திரும்பும் வழியில் சாலையோரத்தில் காத்திருந்த பொதுமக்களையும் முதல்வர் விஜய் சந்தித்தார். குறிப்பாக, மூதாட்டிகள் சிலரை நேரில் சந்தித்து அவர்களின் நலம் குறித்து கேட்டறிந்தார்.
முதல்வரின் இந்த திடீர் சந்திப்பு மற்றும் மூதாட்டிக்கு தனது கூலிங் கிளாஸை பரிசாக வழங்கிய தருணம், மேட்டூர் பயணத்தின் குறிப்பிடத்தக்க நிகழ்வுகளில் ஒன்றாக அமைந்தது.
