விரிவுபடுத்தப்பட்ட பெருந்தலைவர் காமராஜர் காலை உணவுத் திட்டத்தை செப்டம்பர் 17-ம் தேதி விருதுநகரில் தமிழக முதல்வர் ஜோசப் விஜய் தொடங்கி வைக்க உள்ளார். காமராஜர் கல்வி பயின்ற பள்ளியில் இந்த நிகழ்வு நடைபெற உள்ளது.
6 முதல் 8-ம் வகுப்பு வரை விரிவாக்கம்
தமிழகத்தில் ஏற்கெனவே செயல்பாட்டில் உள்ள காலை உணவுத் திட்டம், அரசு மற்றும் அரசு உதவி பெறும் பள்ளிகளில் 6 முதல் 8-ம் வகுப்பு வரை படிக்கும் மாணவர்களுக்கும் விரிவுபடுத்தப்பட உள்ளது. இந்த விரிவாக்கம் செப்டம்பர் 17-ம் தேதி முதல் நடைமுறைக்கு வர உள்ளது.
முதற்கட்டமாக தொடக்கப் பள்ளிகளில் 1 முதல் 5-ம் வகுப்பு வரை பயிலும் மாணவர்களை மையமாகக் கொண்டு செயல்படுத்தப்பட்ட இத்திட்டம், பின்னர் அரசு உதவி பெறும் பள்ளிகளுக்கும் விரிவுபடுத்தப்பட்டது. தற்போதைய விரிவாக்கத்தின் மூலம் மேலும் 15.14 லட்சம் மாணவர்கள் பயன்பெற உள்ளதாக தெரிவிக்கப்பட்டுள்ளது.
காமராஜர் பெயரில் புதிய வடிவம்
தற்போதைய தமிழக அரசு, காலை உணவுத் திட்டத்திற்கு ‘பெருந்தலைவர் காமராஜர் காலை உணவுத் திட்டம்’ என பெயரிட்டு, அதன் செயல்பாட்டை மேலும் விரிவுபடுத்தியுள்ளது. திட்டத்தின் புதிய கட்டத்தை காமராஜரின் நினைவுடன் இணைக்கும் வகையில் விருதுநகரில் தொடங்க ஏற்பாடு செய்யப்பட்டுள்ளது.
ரூ.343 கோடி செலவில் திட்டம்
விரிவுபடுத்தப்பட்ட திட்டத்தை செயல்படுத்த மொத்தம் ரூ.343 கோடி செலவிடப்பட உள்ளது. 2026-27-ம் நிதியாண்டில் இதற்காக ரூ.217 கோடி நிதி ஒதுக்கப்பட்டுள்ளது. திட்ட விரிவாக்கத்துக்கான அரசாணையும் ஜூலை 22-ம் தேதி வெளியிடப்பட்டதாக தெரிவிக்கப்பட்டுள்ளது.
