சென்னை: இந்திய ஆயுள் காப்பீட்டுக் கழகமான எல்ஐசியின் 70-வது ஆண்டு கொண்டாட்டத்தை முன்னிட்டு, பீமா பிளாட்டினம் மற்றும் ஜீவன் ரக்ஷா என்ற இரண்டு புதிய காப்பீட்டு பாலிசிகள் அறிமுகம் செய்யப்பட்டுள்ளன.
எல்ஐசியின் முதன்மை செயல் அதிகாரியும் மேலாண்மை இயக்குநருமான ஆர். துரைஸ்வாமி இந்த புதிய பாலிசிகளை அறிமுகப்படுத்தினார். இந்த இரு திட்டங்களும் செப்டம்பர் 7-ம் தேதி முதல் பொதுமக்களுக்குக் கிடைக்கும் என அறிவிக்கப்பட்டுள்ளது.
பீமா பிளாட்டினம் பாலிசி என்றால் என்ன?
பீமா பிளாட்டினம் என்பது காப்பீட்டுடன் சேமிப்பு அம்சத்தையும் இணைத்து வழங்கும், லாபப் பங்கேற்பு இல்லாத மற்றும் சந்தை சாராத திட்டமாகும். இது வரையறுக்கப்பட்ட காலத்திற்கு பிரீமியம் செலுத்தும் வசதியைக் கொண்டுள்ளது.
இந்தத் திட்டத்தில், பிரீமியம் செலுத்தும் காலத்தில் செலுத்தப்படும் ஒவ்வொரு ரூ.1,000 ஆண்டு பிரீமியத்துக்கும் ரூ.70 உத்தரவாத கூடுதல் தொகையாக கணக்கில் சேர்க்கப்படும் என தெரிவிக்கப்பட்டுள்ளது.
மேலும், பிரீமியம் செலுத்தும் காலம் மற்றும் 5 ஆண்டுகள் நிறைவடைந்த பிறகு, அடிப்படை காப்பீட்டுத் தொகையில் 70 சதவீதம் பூஸ்டர் வருமான பலனாக வழங்கப்படும்.
பாலிசியின் பே-அவுட் காலத்தில் ஒவ்வொரு ஆண்டு முடிவிலும் அடிப்படை காப்பீட்டுத் தொகையில் 10 சதவீதம் சீரான வருமான பலனாக வழங்கப்படும் என எல்ஐசி தெரிவித்துள்ளது.
காப்பீட்டுத் தொகை மற்றும் பிரீமியம் காலம்
பீமா பிளாட்டினம் திட்டத்தில் குறைந்தபட்ச அடிப்படை காப்பீட்டுத் தொகை ரூ.3 லட்சமாக நிர்ணயிக்கப்பட்டுள்ளது. அதிகபட்ச காப்பீட்டுத் தொகைக்கு உச்சவரம்பு இல்லை.
இந்தத் திட்டத்தில் 7, 10, 12, 15 மற்றும் 18 ஆண்டுகள் என பல்வேறு கால அளவுகளில் பிரீமியம் செலுத்தும் வசதி வழங்கப்பட்டுள்ளது.
ஜீவன் ரக்ஷா முழு இடர்க் காப்பீடு
ஜீவன் ரக்ஷா என்பது லாபப் பங்கேற்பு இல்லாத, சந்தை சாராத முழுமையான இடர்க் காப்பீட்டுத் திட்டமாகும்.
இந்த பாலிசியில் சேருவதற்கான குறைந்தபட்ச வயது 18 ஆண்டுகள் என்றும், அதிகபட்ச நுழைவு வயது 45 ஆண்டுகள் என்றும் அறிவிக்கப்பட்டுள்ளது.
பாலிசி முதிர்வுக்கான குறைந்தபட்ச வயது 33 ஆண்டுகளாகவும், அதிகபட்ச முதிர்வு வயது 60 ஆண்டுகளாகவும் நிர்ணயிக்கப்பட்டுள்ளது.
ரூ.5 லட்சம் முதல் ரூ.24 லட்சம் வரை காப்பீடு
ஜீவன் ரக்ஷா பாலிசியின் குறைந்தபட்ச அடிப்படை காப்பீட்டுத் தொகை ரூ.5 லட்சமாகும். அதிகபட்ச அடிப்படை காப்பீட்டுத் தொகை ரூ.24 லட்சம் வரை வழங்கப்படும்.
பெண்களுக்காக இந்தத் திட்டத்தில் சிறப்பு பிரீமிய விகிதங்களும் வழங்கப்படுகின்றன. பாலிசிகளின் தகுதிகள், நிபந்தனைகள் மற்றும் பிற விவரங்களை எல்ஐசியின் அதிகாரப்பூர்வ இணையதளத்தில் தெரிந்துகொள்ளலாம்.
குறிப்பு: காப்பீட்டு பாலிசியில் சேருவதற்கு முன்பு, பாலிசியின் விதிமுறைகள், பிரீமியம் தொகை, காப்பீட்டு பாதுகாப்பு மற்றும் பிற நிபந்தனைகளை முழுமையாகப் படித்து அறிந்துகொள்வது அவசியம்.
