தேனி: மேகமலை வனப் பகுதிகளில் வசிக்கும் வன விவசாயிகள் குடும்பங்களைச் சேர்ந்த அரசு ஊழியர்கள், தங்களது குடும்பத்துடன் அப்பகுதியை விட்டு வெளியேற வேண்டும் என தேனி மாவட்ட நிர்வாகம் உத்தரவிட்டுள்ளது. உத்தரவை பின்பற்றாவிட்டால் துறை ரீதியான ஒழுங்கு நடவடிக்கை எடுக்கப்படும் எனவும் தெரிவிக்கப்பட்டுள்ளது.
98 மலைக் கிராமங்களில் ஆயிரக்கணக்கான மக்கள்
தேனி மாவட்டம் ஆண்டிபட்டி வட்டத்துக்குட்பட்ட கடமலை - மயிலை ஒன்றியத்தில் வருசநாடு, மேகமலை, தும்மக்குண்டு, சிங்கராஜபுரம், நரியூத்து, முத்தாலம்பாறை, பொன்னம்படுகை, தங்கம்மாள்புரம், முருக்கோடை உள்ளிட்ட 9 ஊராட்சிகளில் 98 மலைக் கிராமங்கள் உள்ளன. இப்பகுதிகளில் நீண்ட காலமாக ஆயிரக்கணக்கான மக்கள் வசித்து வருகின்றனர்.
புலிகள் காப்பகமாக அறிவிப்பு
இந்தப் பகுதி கடந்த 2021-ம் ஆண்டு பிப்ரவரி 9-ம் தேதி புலிகள் காப்பகப் பகுதியாக அறிவிக்கப்பட்டது. இதையடுத்து, இங்கு வசித்து வரும் 4,601 பேரை மாற்றுக் குடியிருப்புகளுக்கு அனுப்பும் நடவடிக்கைகள் மேற்கொள்ளப்பட்டு வருகின்றன.
இதுதொடர்பாக நீதிமன்ற உத்தரவுகளும் பிறப்பிக்கப்பட்டுள்ள நிலையில், மேகமலை வனக் கிராம மக்களை வெளியேற்றும் நடவடிக்கைக்கு பல்வேறு அரசியல் கட்சிகளும் அமைப்புகளும் எதிர்ப்பு தெரிவித்து வருகின்றன. தமிழக அரசும் இதுதொடர்பாக மறுசீராய்வு நடவடிக்கை மேற்கொள்ளப்படும் என மக்களிடம் தெரிவித்துள்ளது.
118 அரசு ஊழியர்களுக்கு உத்தரவு
இந்நிலையில், வன விவசாயிகள் குடும்பங்களைச் சேர்ந்த 118 பேர் அரசு மற்றும் அரசு சார்ந்த பல்வேறு துறைகளில் பணியாற்றி வருவதாக தெரிவிக்கப்பட்டுள்ளது. ராணுவம், காவல் துறை, வேளாண்மை, வருவாய்த் துறை, சுகாதாரம், தபால் துறை, நியாய விலைக் கடைகள், விடுதிகள் மற்றும் மின்வாரியம் உள்ளிட்ட துறைகளில் அவர்கள் பணியாற்றி வருகின்றனர்.
இந்த அரசு ஊழியர்களின் குடும்பங்கள் தொடர்ந்து வனப் பகுதியில் வசித்து வந்தால், சம்பந்தப்பட்ட ஊழியர்கள் மீது துறை ரீதியான ஒழுங்கு நடவடிக்கை எடுக்குமாறு அவர்களின் துறை தலைமை அதிகாரிகளுக்கு தேனி மாவட்ட நிர்வாகம் அறிவுறுத்தியுள்ளது.
சத்துணவு ஊழியர்களுக்கும் அறிவுறுத்தல்
ஊதியம் அல்லது கவுரவ ஊதியம் பெறும் சத்துணவு ஊழியர்கள் யாரேனும் மேகமலை வனப் பகுதியில் வசித்து வந்தால், அவர்கள் பாதுகாப்பான இடத்தில் குடியேறி, அங்கிருந்து பணிக்கு வந்து செல்ல வேண்டும் என மாவட்ட சத்துணவுத் துறை அதிகாரிகளும் அறிவுறுத்தியுள்ளனர்.
மக்களிடையே அதிர்ச்சி
மேகமலை வனப் பகுதியில் வசிக்கும் மக்களை மாற்றுக் குடியிருப்புகளுக்கு அனுப்பும் நடவடிக்கைகள் தொடர்பாக ஏற்கெனவே பல்வேறு தரப்பினர் எதிர்ப்பு தெரிவித்து வருகின்றனர். இந்நிலையில், வன விவசாயிகள் குடும்பங்களைச் சேர்ந்த அரசு ஊழியர்களுக்கும் தற்போது ஒழுங்கு நடவடிக்கை எச்சரிக்கையுடன் கூடிய உத்தரவு பிறப்பிக்கப்பட்டிருப்பது அப்பகுதி மக்களிடையே அதிர்ச்சியை ஏற்படுத்தியுள்ளது.
வெளியேற்ற நடவடிக்கை தீவிரம்
புலிகள் காப்பகப் பகுதிக்குள் மனிதக் குடியிருப்புகள் மற்றும் ஆக்கிரமிப்புகள் தொடர்பாக நீதிமன்ற உத்தரவுகள் மற்றும் வனத்துறை நடவடிக்கைகள் தொடர்ந்து வரும் நிலையில், அரசு ஊழியர்கள் குடும்பங்களையும் வெளியேற்றும் நடவடிக்கை தற்போது தீவிரமடைந்துள்ளது.
மக்களின் வாழ்வாதாரம், நீண்டகால குடியிருப்பு உரிமை மற்றும் வனப் பாதுகாப்பு ஆகியவற்றுக்கு இடையே நிலவும் பிரச்சினைக்கு தீர்வு காண வேண்டும் என அப்பகுதி மக்கள் தொடர்ந்து வலியுறுத்தி வருகின்றனர்.
:::