கன்டெய்னர் லாரியில் வந்து ஏடிஎம் கொள்ளை: மேவாட் கும்பலை தேடும் போலீஸ்

சென்னை: சென்னை புறநகர் பகுதிகளில் அடுத்தடுத்து மூன்று ஏடிஎம் மையங்களில் கொள்ளை நடந்த நிலையில், ஒரே பாணியில் செயல்பட்ட ஹரியானாவைச் சேர்ந்த மேவாட் கொள்ளைக் கும்பலைப் பிடிக்க தாம்பரம் போலீஸாரின் தனிப்படை தீவிர விசாரணை மேற்கொண்டு வருகிறது.

நெடுஞ்சாலையோர ஏடிஎம் மையங்களை குறிவைக்கும் இந்தக் கும்பல், காஸ் வெல்டிங் மூலம் இயந்திரத்தை உடைத்து பணத்தை கொள்ளையடிப்பதாக போலீஸார் தெரிவித்துள்ளனர். மேலும், கன்டெய்னர் லாரியில் வாகனத்தை கொண்டு வந்து, கொள்ளைக்குப் பிறகு அதற்குள் இருந்த காரில் தப்பிச் செல்வது இவர்களின் செயல்பாட்டு முறையாக இருந்ததாக விசாரணையில் தெரியவந்துள்ளது.

சோமங்கலத்தில் ரூ.9 லட்சம் கொள்ளை

காஞ்சிபுரம் மாவட்டம் குன்றத்தூர் - ஸ்ரீபெரும்புதூர் நெடுஞ்சாலையில் சோமங்கலத்தை அடுத்த புதுப்பேட்டில் உள்ள ஏடிஎம் மையத்தில் கடந்த ஆகஸ்ட் 25-ம் தேதி கொள்ளை நடைபெற்றது.

கொள்ளையர்கள் முதலில் ஏடிஎம் மையத்தின் அபாய அலாரத்தை செயலிழக்கச் செய்துள்ளனர். தொடர்ந்து சிசிடிவி கேமராக்களில் ஸ்பிரே அடித்து பதிவுகளைத் தடுக்க முயன்றுள்ளனர். பின்னர் காஸ் வெல்டிங் மூலம் ஏடிஎம் இயந்திரத்தை உடைத்து சுமார் ரூ.9 லட்சம் பணத்தை எடுத்துச் சென்றுள்ளனர்.

கும்மிடிப்பூண்டியிலும் அடுத்தடுத்து கொள்ளை

சோமங்கலம் சம்பவம் தொடர்பாக போலீஸார் விசாரணை நடத்தி வந்த நிலையில், ஆகஸ்ட் 27-ம் தேதி கும்மிடிப்பூண்டி அருகே சென்னை - கொல்கத்தா தேசிய நெடுஞ்சாலையில் இருந்த இரண்டு ஏடிஎம் மையங்களிலும் அடுத்தடுத்து கொள்ளை நடைபெற்றது.

மூன்று சம்பவங்களிலும் கொள்ளையர்கள் ஒரே மாதிரியான முறையைப் பயன்படுத்தியிருப்பது விசாரணையில் தெரியவந்தது. இதையடுத்து, மூன்று கொள்ளைகளுக்கும் ஒரே கும்பல் காரணமாக இருக்கலாம் என்ற கோணத்தில் போலீஸார் விசாரணையை தீவிரப்படுத்தினர்.

ஹரியானாவை நோக்கி சென்ற தனிப்படை

சிசிடிவி காட்சிகள் மற்றும் கொள்ளையர்கள் பயன்படுத்திய வாகனங்கள் உள்ளிட்ட பல்வேறு தகவல்களை போலீஸார் ஆய்வு செய்தனர். அதன் அடிப்படையில், இந்தச் சம்பவங்களின் பின்னணியில் ஹரியானாவைச் சேர்ந்த மேவாட் கொள்ளைக் கும்பல் இருப்பது தெரியவந்ததாக போலீஸார் தெரிவித்தனர்.

இதையடுத்து தாம்பரம் போலீஸாரின் தனிப்படை ஹரியானாவுக்குச் சென்று, அங்குள்ள உள்ளூர் போலீஸாரின் உதவியுடன் கொள்ளையர்களைத் தேடும் பணியில் ஈடுபட்டுள்ளது.

யார் இந்த மேவாட் கொள்ளையர்கள்?

ஹரியானா மாநிலத்தின் நூஹ் மாவட்டம் முன்பு மேவாட் மாவட்டம் என்று அழைக்கப்பட்டது. ஹரியானா, ராஜஸ்தான் மற்றும் உத்தரப் பிரதேச எல்லைப் பகுதிகளை ஒட்டியுள்ள குறிப்பிட்ட கொள்ளைக் கும்பல்களை போலீஸார் பொதுவாக மேவாட் கொள்ளையர்கள் என்று குறிப்பிடுகின்றனர்.

தமிழகம், கேரளா, கர்நாடகா, டெல்லி, ஆந்திரப் பிரதேசம், தெலங்கானா உள்ளிட்ட பல மாநிலங்களில் ஏடிஎம் கொள்ளை உள்ளிட்ட பல்வேறு குற்ற வழக்குகள் இந்தக் கும்பலைச் சேர்ந்தவர்கள் மீது இருப்பதாக போலீஸார் கூறுகின்றனர். தமிழகத்தில் மட்டும் 50-க்கும் மேற்பட்ட கொள்ளை வழக்குகள் இருப்பதாகவும் தெரிவிக்கப்பட்டுள்ளது.

2023 பிப்ரவரியில் திருவண்ணாமலை மாவட்டத்தில் அடுத்தடுத்து நான்கு ஏடிஎம் மையங்களில் கொள்ளையடிக்கப்பட்டு சுமார் ரூ.72 லட்சம் பணம் எடுத்துச் செல்லப்பட்டதாகவும் போலீஸார் குறிப்பிட்டுள்ளனர்.

நெடுஞ்சாலையோர ஏடிஎம்களை குறிவைக்கும் கும்பல்

நெடுஞ்சாலையோரங்களில் அமைந்துள்ள ஏடிஎம் மையங்களை குறிவைப்பதில் இந்தக் கும்பல் தேர்ச்சி பெற்றுள்ளதாக போலீஸார் தெரிவித்துள்ளனர். அலாரத்தை செயலிழக்கச் செய்தல், இயந்திரத்தை உடைத்தல், சிசிடிவி பதிவுகளைத் தடுக்கும் முயற்சி உள்ளிட்ட முறைகளைப் பயன்படுத்துவதாக கூறப்படுகிறது.

ஒரே பகுதியில் ஒரு ஏடிஎம் மையத்தை மட்டும் குறிவைக்காமல், தொடர்ந்து பல மையங்களில் கொள்ளையடித்துவிட்டு சொந்த மாநிலத்துக்குத் திரும்புவது இவர்களின் வழக்கமான செயல்பாட்டு முறையாக இருப்பதாகவும் போலீஸ் விசாரணையில் தெரிவிக்கப்பட்டுள்ளது.

கொள்ளையர்களை பிடிப்பதில் போலீஸாருக்கு சவால்

மேவாட் பகுதியிலுள்ள சில கிராமங்களில் கொள்ளையர்கள் பதுங்கியிருப்பதாக கூறப்படும் நிலையில், அவர்களை கைது செய்வதில் போலீஸாருக்கு சவால்கள் இருப்பதாக தெரிவிக்கப்பட்டுள்ளது. உள்ளூர் மக்களின் எதிர்ப்பு காரணமாக சில நேரங்களில் போலீஸார் கிராமங்களுக்குள் செல்வதிலும் சிக்கல் ஏற்படுவதாக கூறப்படுகிறது.

கொள்ளையடிக்கப்பட்ட பணத்தின் ஒரு பகுதி வழக்குகள் மற்றும் பிற செலவுகளுக்காக பயன்படுத்தப்படுவதால், குற்றவாளிகளை கைது செய்தாலும் முழுப் பணத்தையும் மீட்பது சவாலாக இருப்பதாக போலீஸார் தெரிவித்துள்ளனர்.

செல்போன் காட்டிக்கொடுத்த தடயம்

சோமங்கலம் ஏடிஎம் கொள்ளை தொடர்பான விசாரணையில், கொள்ளையர்கள் கன்டெய்னர் லாரியில் வந்து, அதற்குள் கொண்டு வரப்பட்ட சொகுசு காரில் தப்பிச் சென்றது சிசிடிவி காட்சிகள் மூலம் தெரியவந்தது.

இதையடுத்து தெலங்கானா போலீஸாருக்கு தகவல் தெரிவிக்கப்பட்டது. அவர்கள் அந்த காரை வழிமறித்தபோது, கொள்ளையர்கள் துப்பாக்கியைக் காட்டி தப்பியதாக கூறப்படுகிறது. பின்னர் தெலங்கானா - மகாராஷ்டிரா எல்லையில் நிறுத்தப்பட்டிருந்த சொகுசு கார் கண்டுபிடிக்கப்பட்டு பறிமுதல் செய்யப்பட்டது.

கொள்ளையர்கள் தப்பிச் சென்றபோது தவறவிட்ட செல்போன் ஒன்று, அவர்களின் பின்னணியை கண்டறிவதில் முக்கிய தடயமாக அமைந்ததாக போலீஸார் தெரிவித்துள்ளனர். அந்த செல்போனில் கிடைத்த தகவல்களின் அடிப்படையில் தனிப்படை ஹரியானாவில் விசாரணை மேற்கொண்டு வருகிறது.

பவன்குமார் கைது: விசாரணையில் முக்கிய திருப்பம்

இதற்கிடையில், போலீஸார் தேடி வந்த மேவாட் கொள்ளையர்களில் ஒருவரான பவன்குமார், வேறு ஒரு குற்ற வழக்கில் ஜெய்ப்பூர் போலீஸாரால் கைது செய்யப்பட்டிருப்பது தெரியவந்துள்ளது.

அவரிடம் நடத்தப்பட்ட விசாரணையில், சோமங்கலம் மற்றும் கும்மிடிப்பூண்டி பகுதிகளில் நடைபெற்ற ஏடிஎம் கொள்ளைகளில் பவன்குமார் தலைமையிலான குழுவினர் ஈடுபட்டிருப்பது உறுதி செய்யப்பட்டுள்ளதாக போலீஸார் தெரிவித்துள்ளனர்.

பவன்குமாரை விசாரிக்க சட்டப்படியான நடவடிக்கைகள் மேற்கொள்ளப்பட்டு வரும் நிலையில், ஹரியானாவில் தலைமறைவாக உள்ள மற்ற கொள்ளையர்களையும் கைது செய்து, கொள்ளையடிக்கப்பட்ட பணத்தை மீட்கும் நடவடிக்கையில் தனிப்படை போலீஸார் தொடர்ந்து ஈடுபட்டுள்ளனர்.