மிசாவில் ஸ்டாலின் கைது செய்யப்பட்டதற்கான பதிவு இல்லை: அமைச்சர் நிர்மல் குமார்

சென்னை: மு.க.ஸ்டாலின் மிசா சட்டத்தின் கீழ் கைது செய்யப்பட்டதாக எந்தப் பதிவிலும் குறிப்பிடப்படவில்லை என்று சட்டத்துறை அமைச்சர் நிர்மல் குமார் தமிழக சட்டப்பேரவையில் தெரிவித்துள்ளார். பெண்கள் குறித்து அவதூறாக பேசியதன் அடிப்படையிலேயே அவர் கைது செய்யப்பட்டதாக பதிவுகள் இருப்பதாகவும் அமைச்சர் கூறியுள்ளார்.

முதல்வர் விஜய் பேச்சுக்கு அமைச்சர் விளக்கம்

சட்டப்பேரவையில் இன்று பேசிய அமைச்சர் நிர்மல் குமார், முதல்வர் விஜய் நேற்று அவையில் பேசிய விவகாரங்கள் குறித்து விளக்கம் அளித்தார்.

நீதிமன்றத்தில் அமலாக்கத் துறை சமர்ப்பித்த ஆதாரங்கள் தொடர்பாக மட்டுமே முதல்வர் பேசியதாகவும், நீதிமன்ற விசாரணை குறித்தோ அல்லது நீதிமன்றம் குறித்தோ அவர் எதுவும் பேசவில்லை என்றும் அமைச்சர் தெரிவித்தார்.

மேலும், சர்காரியா கமிஷன் தொடர்பான விவரங்கள் ஏற்கெனவே சட்டப்பேரவை பதிவுகளில் இடம்பெற்றுள்ளதாகவும், அதில் உள்ள தகவல்களைத்தான் முதல்வர் குறிப்பிட்டதாகவும் அவர் கூறினார்.

சர்காரியா கமிஷன் குறித்து அமைச்சர் கூறியது என்ன?

அப்போதைய முதல்வர் கருணாநிதி சார்ந்த பணப் பரிவர்த்தனைகள் தொடர்பான விவரங்கள் சர்காரியா கமிஷன் விசாரணையில் இடம்பெற்றுள்ளதாக அமைச்சர் தெரிவித்தார்.

குறிப்பிட்ட குற்றச்சாட்டுகளில் ஆறு குற்றச்சாட்டுகளுக்கு ஆதாரங்கள் இருப்பதாக சர்காரியா கமிஷன் தெரிவித்ததாகவும், அதன் அடிப்படையில் சிபிஐ வழக்குப் பதிவு செய்ததாகவும் நிர்மல் குமார் கூறினார்.

சர்காரியா கமிஷன் அறிக்கையில் இடம்பெற்ற தகவல்களையே முதல்வர் விஜய் சட்டப்பேரவையில் எடுத்துரைத்ததாகவும், இதில் மறைப்பதற்கு எதுவும் இல்லை என்றும் அமைச்சர் தெரிவித்தார்.

மிசா கைது குறித்து புதிய சர்ச்சை

மிசா காலகட்டத்தில் பல்வேறு குற்றச்சாட்டுகளின் அடிப்படையிலும் கைது நடவடிக்கைகள் மேற்கொள்ளப்பட்டதாக அமைச்சர் கூறினார். திருட்டு, வழிப்பறி உள்ளிட்ட வழக்குகளிலும், பெண்கள் தொடர்பான புகார்களிலும் அந்தக் காலகட்டத்தில் கைது நடவடிக்கைகள் நடைபெற்றதாக அவர் தெரிவித்தார்.

எனவே, அந்தக் காலகட்டத்தில் கைது செய்யப்பட்ட அனைவரும் மிசா சட்டத்தின் கீழ் கைது செய்யப்பட்டவர்கள் என்று கூற முடியாது என்றும் அமைச்சர் விளக்கமளித்தார்.

“ஸ்டாலின் கைது தொடர்பாக பதிவுகளில் வேறு தகவல் உள்ளது”

அப்போதைய பிரதமர் இந்திரா காந்தி அறிவித்த 20 அம்சத் திட்டம் தொடர்பாக மு.க.ஸ்டாலின் தெரிவித்த கருத்துகளையும் அமைச்சர் குறிப்பிட்டார்.

“பெண்கள் குறித்து அவதூறாக பேசியதால்தான் ஸ்டாலின் கைது செய்யப்பட்டார் என்றுதான் குறிப்புகள் உள்ளன. மிசா சட்டத்தின் கீழ்தான் அவர் கைது செய்யப்பட்டார் என்று எந்தப் பதிவிலும் இல்லை” என்று அமைச்சர் நிர்மல் குமார் தெரிவித்தார்.

மேலும், இரா.செழியன் மொழிபெயர்த்த புத்தகத்திலும் ஸ்டாலின் மிசா சட்டத்தின் கீழ் கைது செய்யப்பட்டதாக குறிப்பிடப்படவில்லை என்று அமைச்சர் கூறினார்.

எதிர்க்கட்சிக்கும் அமைச்சர் விமர்சனம்

அப்போது ஸ்டாலின் மேற்கொண்டதாக கூறப்படும் நடவடிக்கைகளைப் போலவே தற்போது எதிர்க்கட்சித் தலைவரும் செயல்படுவதாக அமைச்சர் குற்றம்சாட்டினார்.

எதிர்க்கட்சியினர் அவையில் பயன்படுத்தும் கடுமையான மற்றும் ஆபாசமான வார்த்தைகளை தவிர்க்க வேண்டும் என்றும் அமைச்சர் நிர்மல் குமார் கேட்டுக்கொண்டார்.

மிசா சட்டத்தின் கீழ் மு.க.ஸ்டாலின் கைது செய்யப்பட்டாரா என்பது தொடர்பான இந்த விவகாரம், தமிழக சட்டப்பேரவையில் ஆளும் தரப்புக்கும் எதிர்க்கட்சிக்கும் இடையே புதிய அரசியல் விவாதத்தை ஏற்படுத்தியுள்ளது.