பிரதமர் மோடிக்கு உஸ்பெகிஸ்தானின் உயரிய ‘டஸ்ட்லிக்’ விருது

தாஷ்கண்ட்: உஸ்பெகிஸ்தானுக்கு அரசு முறைப் பயணம் மேற்கொண்டுள்ள பிரதமர் நரேந்திர மோடிக்கு, அந்நாட்டின் உயரிய விருதான ‘Oliy Darajali Do'stlik’ வழங்கி கவுரவிக்கப்பட்டது.

இரண்டு நாள் பயணமாக உஸ்பெகிஸ்தான் சென்ற பிரதமர் மோடிக்கு தலைநகர் தாஷ்கண்டில் சிறப்பான வரவேற்பு அளிக்கப்பட்டது. விமான நிலையத்தில் அவரை உஸ்பெகிஸ்தான் அதிபர் ஷவ்கத் மிர்சியோயேவ் வரவேற்றார். பின்னர் இருவரும் ஒரே காரில் அதிபர் மாளிகைக்குச் சென்றனர்.

நினைவுச் சின்னத்தில் மரியாதை

தாஷ்கண்டில் இந்திய வம்சாவளியினரின் வரவேற்பு நிகழ்ச்சியில் பிரதமர் மோடி பங்கேற்றார். தொடர்ந்து யாங்கி உஸ்பெகிஸ்தான் பூங்காவுக்குச் சென்ற அவர், அங்குள்ள சுதந்திர நினைவுச் சின்னத்தில் மலர்வளையம் வைத்து மரியாதை செலுத்தினார்.

இதையடுத்து அதிபர் மாளிகையில் பிரதமர் மோடிக்கு இரவு விருந்து அளிக்கப்பட்டது. இரு தலைவர்களும் பல்வேறு இருதரப்பு விவகாரங்கள் குறித்து கலந்துரையாடினர்.

யோகா நிகழ்ச்சியில் பிரதமர் மோடி

பயணத்தின் இரண்டாவது நாளில் உஸ்பெகிஸ்தான் யோகா கூட்டமைப்பு ஏற்பாடு செய்திருந்த யோகா நிகழ்ச்சியை பிரதமர் மோடி பார்வையிட்டார். அங்கு பங்கேற்ற யோகா குழுவினருடன் அவர் கலந்துரையாடினார்.

வர்த்தகம், பாதுகாப்பு குறித்து பேச்சுவார்த்தை

பின்னர் பிரதமர் மோடியும் அதிபர் மிர்சியோயேவும் இருதரப்பு பேச்சுவார்த்தை நடத்தினர். இந்தியா - உஸ்பெகிஸ்தான் இடையேயான வர்த்தகத்தை மேலும் அதிகரிப்பது, பாதுகாப்புத் துறையில் ஒத்துழைப்பை வலுப்படுத்துவது மற்றும் எரிசக்தி உள்ளிட்ட துறைகளில் இணைந்து செயல்படுவது குறித்து ஆலோசிக்கப்பட்டது.

இரு நாடுகளுக்கும் இடையே கல்வி மற்றும் தகவல் தொழில்நுட்பம் உள்ளிட்ட துறைகளிலும் ஒத்துழைப்பு நிலவி வருகிறது. இந்தியாவிலிருந்து உஸ்பெகிஸ்தானுக்கு மருந்துகள் மற்றும் தொழில்துறைக்குத் தேவையான இயந்திரங்கள் ஏற்றுமதி செய்யப்படுகின்றன. அதேபோல் உஸ்பெகிஸ்தானிலிருந்து உரங்கள், பழங்கள் உள்ளிட்ட பொருட்கள் இந்தியாவுக்கு இறக்குமதி செய்யப்படுகின்றன.

உயரிய விருது வழங்கி கவுரவிப்பு

இந்தச் சந்திப்புகளுக்குப் பின்னர் பிரதமர் நரேந்திர மோடிக்கு உஸ்பெகிஸ்தான் நாட்டின் உயரிய விருதான ‘Oliy Darajali Do'stlik’ வழங்கப்பட்டது. இரு நாடுகளுக்கும் இடையேயான நட்புறவு மற்றும் ஒத்துழைப்பை வலுப்படுத்தியதற்காக இந்த விருது வழங்கப்பட்டதாக தெரிவிக்கப்பட்டுள்ளது.

சோவியத் யூனியனில் இருந்து பிரிந்த உஸ்பெகிஸ்தான், 1991-ம் ஆண்டு சுதந்திர நாடாக உருவானது. இயற்கை எரிவாயு, யுரேனியம், தங்கம் உள்ளிட்ட இயற்கை வளங்கள் அந்நாட்டில் குறிப்பிடத்தக்க அளவில் உள்ளன.

4-வது முறையாக உஸ்பெகிஸ்தான் பயணம்

பிரதமர் மோடி உஸ்பெகிஸ்தானுக்கு செல்வது இது 4-வது முறையாகும். உஸ்பெகிஸ்தான் பயணத்தை நிறைவு செய்த பிறகு அவர் கிர்கிஸ்தான் செல்ல உள்ளார்.