சென்னை உயர்நீதிமன்றத்தில் தமிழ் முதன்மை மொழி: சட்டசபையில் ஒருமனதாக தீர்மானம் நிறைவேற்றம்

சென்னை: சென்னை உயர்நீதிமன்றத்தின் முதன்மை மொழியாக தமிழை அங்கீகரிக்க வேண்டும் என வலியுறுத்தி, தமிழக சட்டசபையில் முதல்வர் விஜய் கொண்டு வந்த தனித்தீர்மானம் ஒருமனதாக நிறைவேற்றப்பட்டது.

சென்னை உயர்நீதிமன்றத்தில் தமிழை வழக்காடு மற்றும் முதன்மை மொழியாக பயன்படுத்துவதற்கான கோரிக்கையை வலியுறுத்தி, சட்டசபையில் முதல்வர் விஜய் தனித்தீர்மானத்தை முன்மொழிந்தார். இந்த தீர்மானத்திற்கு பல்வேறு அரசியல் கட்சிகள் ஆதரவு தெரிவித்ததைத் தொடர்ந்து, அது ஒருமனதாக நிறைவேற்றப்பட்டது.

தமிழ் முதன்மை மொழியாக அங்கீகரிக்க வேண்டும்

தீர்மானத்தை முன்மொழிந்து முதல்வர் விஜய் பேசுகையில், மெட்ராஸ் உயர்நீதிமன்றத்தின் முதன்மை மொழியாக தமிழை அங்கீகரிப்பது காலத்தின் தேவையாகும் என்று தெரிவித்தார்.

உலகம் முழுவதும் சுமார் 9 கோடி மக்களால் தமிழ் பேசப்படுவதாகக் குறிப்பிட்ட அவர், தமிழ் மொழி தமிழக மக்களின் உயிரோடும் உணர்வோடும் இணைந்த மொழியாக விளங்குகிறது என்றார்.

தமிழ் ஏற்கனவே அரசு நிர்வாகம், கல்வி மற்றும் மாவட்ட நீதிமன்ற நடவடிக்கைகளில் பயன்படுத்தப்பட்டு வருவதாகவும், அதேபோல் சென்னை உயர்நீதிமன்றத்தின் நடவடிக்கைகளிலும் தமிழைப் பயன்படுத்துவதற்கான அதிகாரம் வழங்கப்பட வேண்டும் என்றும் அவர் வலியுறுத்தினார்.

தீர்ப்புகளையும் உத்தரவுகளையும் தமிழில் வழங்க கோரிக்கை

உயர்நீதிமன்றத்தில் வழங்கப்படும் தீர்ப்புகள் மற்றும் உத்தரவுகளை தமிழிலும் வழங்கும் வகையில் தேவையான கட்டமைப்பு உருவாக்கப்பட வேண்டும் என்று முதல்வர் விஜய் தெரிவித்தார்.

மேலும், நீதிமன்றத்தில் தமிழில் மனுக்கள் மற்றும் பிற ஆவணங்களை சமர்ப்பிப்பதற்கான உரிய நடைமுறைகள் ஏற்படுத்தப்பட வேண்டும் என்றும் அவர் கூறினார்.

நீதிபதிகள், வழக்கறிஞர்கள் மற்றும் நீதிமன்றப் பணியாளர்களுக்கு சட்டத் தமிழ் மற்றும் மொழிபெயர்ப்பு தொடர்பான சிறப்பு பயிற்சிகள் வழங்கப்பட வேண்டும் என்றும் தீர்மானத்தில் வலியுறுத்தப்பட்டது.

மக்களுக்கு எளிதாக புரியும் நீதி நடைமுறை

மாவட்ட நீதிமன்றங்களில் தற்போது தமிழ் வழக்காடு மொழியாக பயன்படுத்தப்பட்டு வரும் நிலையில், வழக்கு தொடர்பான வாதங்கள் தமிழில் நடைபெறும்போது பொதுமக்களுக்கும் வழக்குத் தரப்பினருக்கும் நீதிமன்ற நடவடிக்கைகளை எளிதாகப் புரிந்துகொள்ள முடியும் என்று முதல்வர் விஜய் தெரிவித்தார்.

தமிழை உயர்நீதிமன்றத்தின் முதன்மை மொழியாக்க வேண்டும் என்ற கோரிக்கை எந்த மொழிக்கும் எதிரானது அல்ல என்றும், தமிழ் மொழிக்கான சட்டப்பூர்வ அங்கீகாரத்தைப் பெறும் முயற்சியாகவே இதைப் பார்க்க வேண்டும் என்றும் அவர் குறிப்பிட்டார்.

மத்திய அரசு மற்றும் குடியரசுத் தலைவர் ஒப்புதல் அவசியம்

சென்னை உயர்நீதிமன்றத்தில் தமிழைப் பயன்படுத்துவதற்கான நடவடிக்கைக்கு குடியரசுத் தலைவர் மற்றும் மத்திய அரசின் ஒப்புதல் தேவைப்படுவதாகவும், தமிழக சட்டசபை நிறைவேற்றிய தீர்மானத்தின் அடிப்படையில் தேவையான நடவடிக்கைகளை மத்திய அரசு விரைந்து மேற்கொள்ள வேண்டும் என்றும் முதல்வர் விஜய் வலியுறுத்தினார்.

இந்த வரலாற்றுச் சிறப்புமிக்க தீர்மானத்திற்கு அனைத்து சட்டமன்ற உறுப்பினர்களும் ஆதரவு அளிக்க வேண்டும் என்றும் அவர் கேட்டுக்கொண்டார்.

பல்வேறு கட்சிகள் வரவேற்பு

முதல்வர் விஜய் கொண்டு வந்த தனித்தீர்மானத்திற்கு திமுக, அதிமுக, பாமக, தேமுதிக, விடுதலைச் சிறுத்தைகள் கட்சி மற்றும் இந்திய கம்யூனிஸ்ட் உள்ளிட்ட பல்வேறு அரசியல் கட்சிகள் ஆதரவு தெரிவித்தன.

இதையடுத்து, சென்னை உயர்நீதிமன்றத்தின் முதன்மை மொழியாக தமிழை அங்கீகரிக்கக் கோரும் தனித்தீர்மானம் தமிழக சட்டசபையில் ஒருமனதாக நிறைவேற்றப்பட்டது.