அரசு போக்குவரத்துக் கழக ஒப்பந்த தொழிலாளர்களை பணி நிரந்தரம் செய்ய வேண்டும்: சௌமியா அன்புமணி

சென்னை: தமிழக அரசு போக்குவரத்துக் கழகங்களில் பணியாற்றி வரும் ஒப்பந்த தொழிலாளர்களை பணி நிரந்தரம் செய்ய வேண்டும் என்று பாமக சட்டப்பேரவை உறுப்பினர் சௌமியா அன்புமணி வலியுறுத்தியுள்ளார்.

சட்டப்பேரவையில் கோரிக்கை

தமிழக சட்டப்பேரவையில் நடைபெற்ற போக்குவரத்துத் துறை, நிதி, திட்டம், வளர்ச்சித் துறை மற்றும் பொதுத்துறை மானியக் கோரிக்கைகள் மீதான விவாதத்தில் சௌமியா அன்புமணி பேசினார்.

அப்போது, ஊழல் தடுப்புக்காக அரசு மேற்கொண்டு வரும் நடவடிக்கைகளை வரவேற்ற அவர், ஊழல் தடுப்புத் துறையில் கூடுதல் உதவி ஆய்வாளர்கள் மற்றும் துணைக் கண்காணிப்பாளர்களை நியமிக்க வேண்டும் எனக் கேட்டுக்கொண்டார்.

சேவை உரிமைச் சட்டத்தை விரைவாக செயல்படுத்த வலியுறுத்தல்

பொதுமக்கள் தங்களுக்கான அரசு சேவைகளை உரிய காலத்தில் பெறுவதற்கு சேவை உரிமைச் சட்டத்தை விரைந்து அமல்படுத்த வேண்டும் என்றும் அவர் வலியுறுத்தினார்.

ஊழல் ஒழிப்பு நடவடிக்கைகளின் பயன்கள் நேரடியாக மக்களை சென்றடைய வேண்டும் என்றும் சவுமியா அன்புமணி தெரிவித்தார். மின்துறையில் ஊழல் குறைந்தால் அதன் பலன் மின் கட்டணத்திலும், பள்ளிக் கல்வித் துறையில் ஊழல் குறைந்தால் கல்விக் கட்டணத்திலும் பிரதிபலிக்க வேண்டும் என்றார்.

எம்எல்ஏ தொகுதி மேம்பாட்டு நிதியை உயர்த்த கோரிக்கை

சட்டப்பேரவை உறுப்பினர்களின் தொகுதி மேம்பாட்டு நிதியை ரூ.5 கோடியாக உயர்த்த வேண்டும் எனவும் அவர் கோரிக்கை விடுத்தார்.

தற்போதுள்ள விதிகளின்படி தொகுதி மேம்பாட்டு நிதியை குடிநீர் சுத்திகரிப்பு தொடர்பான ஆர்.ஓ. திட்டங்களுக்கு பயன்படுத்த முடியாத நிலை உள்ளதாகக் குறிப்பிட்ட அவர், அந்தப் பணிகளுக்கும் நிதியை பயன்படுத்தும் வகையில் விதிவிலக்கு வழங்க வேண்டும் என்றார்.

ஈழத் தமிழர்களுக்கு வீட்டு வசதி உள்ளிட்ட திட்டங்கள்

தமிழகத்தில் உள்ள 106 அகதிகள் முகாம்களில் சுமார் 57 ஆயிரம் ஈழத் தமிழர்கள் வசித்து வருவதாக சவுமியா அன்புமணி தெரிவித்தார்.

அவர்களுக்கு வீட்டு வசதி உள்ளிட்ட அடிப்படைத் தேவைகளை நிறைவேற்றுவதற்கான நடவடிக்கைகளை அரசு மேற்கொள்ள வேண்டும் என்றும் அவர் கேட்டுக்கொண்டார்.

ஈழத் தமிழர்களின் நலன் குறித்து சட்டப்பேரவையில் பேசுமாறு பாமக தலைவர் ராமதாஸ் தன்னை தொலைபேசியில் தொடர்புகொண்டு கேட்டுக்கொண்டதாகவும் சவுமியா அன்புமணி தெரிவித்தார்.

கிராமங்களில் மினி பேருந்துகள் இயக்க வலியுறுத்தல்

கிராமப்புற மக்களின் போக்குவரத்து தேவையை கருத்தில் கொண்டு, கிராமங்களில் கூடுதல் மினி பேருந்துகளை இயக்க வேண்டும் என அவர் வலியுறுத்தினார்.

மேலும், தற்போது அரசு பேருந்துகளில் நடைமுறையில் உள்ள மகளிர் இலவச பேருந்து பயணத் திட்டத்தை தனியார் பேருந்துகளுக்கும் விரிவுபடுத்த வேண்டும் என்றும் அவர் கோரிக்கை விடுத்தார்.

ஒப்பந்த தொழிலாளர்களை நிரந்தரம் செய்ய வேண்டும்

அரசு போக்குவரத்துக் கழகங்களில் நீண்ட காலமாக ஒப்பந்த அடிப்படையில் பணியாற்றி வரும் தொழிலாளர்களின் பணிப் பாதுகாப்பை உறுதி செய்யும் வகையில், அவர்களை பணி நிரந்தரம் செய்ய தமிழக அரசு நடவடிக்கை எடுக்க வேண்டும் என சௌமியா அன்புமணி சட்டப்பேரவையில் வலியுறுத்தினார