சென்னை: தமிழக அரசின் ‘வெற்றித் தமிழ்நாடு முதலீட்டாளர்கள் மாநாடு-2026’ சென்னையில் நடைபெற்றது. முதல்வர் விஜய் தலைமையில் நடைபெற்ற மாநாட்டில், ரூ.67,452 கோடி மதிப்பிலான 97 முதலீட்டு ஒப்பந்தங்கள் கையெழுத்தாகின.
இந்த முதலீடுகள் மூலம் 1,06,998 பேருக்கு வேலைவாய்ப்பு கிடைக்கும் என தெரிவிக்கப்பட்டுள்ளது. மாநாட்டுக்கு முன்பு மேற்கொள்ளப்பட்ட முதலீட்டு ஒப்பந்தங்களையும் சேர்த்து, அரசு பொறுப்பேற்ற முதல் 100 நாட்களுக்குள் ரூ.1,02,514 கோடி முதலீடுகள் ஈர்க்கப்பட்டுள்ளதாக தெரிவிக்கப்பட்டுள்ளது.
முக்கிய முதலீடுகள்
- விண்வெளித் துறை: தூத்துக்குடியில் ஸ்கைரூட் ஏரோஸ்பேஸ் மற்றும் அக்னிகுல் காஸ்மோஸ் நிறுவனங்கள் இணைந்து ரூ.650 கோடியில் ஏவுகலன் தயாரிப்பு மற்றும் சோதனை மையங்களை அமைக்கின்றன.
- மின்சார வாகனங்கள்: கிருஷ்ணகிரியில் அல்ட்ரா வயலட் நிறுவனம் ரூ.779 கோடியில் உற்பத்தி ஆலையை அமைக்கிறது.
- செமிகண்டக்டர்: சென்னையில் சூப்பர் மைக்ரோ நிறுவனம் ரூ.477 கோடியில் சர்வர் உற்பத்தி ஆலையை அமைக்கிறது.
- காஞ்சிபுரம்: ஜேகே டயர் நிறுவனம் ரூ.5,143 கோடியில் விரிவாக்கம் மேற்கொண்டு 3,510 பேருக்கு வேலைவாய்ப்பு வழங்க உள்ளது.
- திருவள்ளூர் மற்றும் தூத்துக்குடி: ஆவிட் குழுமம் ரூ.7,000 கோடியில் முதலீடு செய்து 12,000 பேருக்கு வேலைவாய்ப்பு வழங்க திட்டமிட்டுள்ளது.
- ஒரகடம்: டைம்லர் நிறுவனம் ரூ.4,000 கோடியில் உற்பத்தி மற்றும் ஆராய்ச்சி மையத்தை விரிவுபடுத்த உள்ளது.
ராமநாதபுரத்தில் ரூ.1,000 கோடி முதலீடு
தொழில் வளர்ச்சியில் பின்தங்கிய மாவட்டங்களில் ஒன்றான ராமநாதபுரத்தில் முதல் முறையாக கோத்தாரி குழுமம் ரூ.1,000 கோடி முதலீட்டில் காலணி உற்பத்தி ஆலையை அமைக்க உள்ளது. இதன் மூலம் 10,000 பேருக்கு வேலைவாய்ப்பு கிடைக்கும் என தெரிவிக்கப்பட்டுள்ளது.
மேலும், ஓசூரில் டைட்டன் நிறுவனம் ரூ.1,000 கோடியில் புதிய ஆலையை அமைக்க ஒப்பந்தம் செய்துள்ளது. இதன் மூலம் 1,200 பேருக்கு வேலைவாய்ப்பு கிடைக்கும் என கூறப்பட்டுள்ளது.
சர்வதேச நிறுவனங்களுடன் ஒப்பந்தங்கள்
வர்த்தகம், இணையப் பாதுகாப்பு மற்றும் செமிகண்டக்டர் திறன் மேம்பாடு உள்ளிட்ட துறைகளில் கஜகஸ்தான், நியூசிலாந்து மற்றும் ரஷ்யாவின் ஸ்பெர்பேங்க் உள்ளிட்ட நிறுவனங்களுடன் ஒப்பந்தங்கள் மேற்கொள்ளப்பட்டுள்ளன.
மேலும், தமிழகத்தில் தயாரிக்கப்படும் பொருட்களை சர்வதேச சந்தைக்கு கொண்டு செல்ல வால்மார்ட் நிறுவனத்துடன் இணைந்து திட்டம் செயல்படுத்தப்பட உள்ளது. போஷ் நிறுவனத்துடன் இணைந்து 10,000 மாணவர்களுக்கு இணையப் பாதுகாப்புப் பயிற்சி வழங்கவும் திட்டமிடப்பட்டுள்ளது.
