சென்னை: தமிழக முதல்வர் விஜய்யைச் சந்தித்த மக்களவை எதிர்க்கட்சித் தலைவர் ராகுல் காந்தி, அவருடன் சுமார் ஒரு மணி நேரம் ஆலோசனை நடத்தினார். பின்னர் இருவரும் ஒரே காரில் பயணம் செய்து, கிரிக்கெட் வீரர் எம்.எஸ்.தோனிக்குச் சொந்தமான உணவகத்துக்குச் சென்றனர்.
விஜய் இல்லத்தில் ராகுல் காந்தி
சென்னை தீவுத்திடலில் நடைபெறும் ‘மாணவர்கள் குரல்’ நிகழ்ச்சியில் பங்கேற்பதற்காக ராகுல் காந்தி சென்னைக்கு வந்தார். விமான நிலையத்திலிருந்து நீலாங்கரையில் உள்ள முதல்வர் விஜய்யின் இல்லத்துக்குச் சென்றார்.
அங்கு ராகுல் காந்திக்கு விஜய் மதிய விருந்து அளித்தார். தொடர்ந்து இருவரும் சுமார் ஒரு மணி நேரம் ஆலோசனை நடத்தினர். இந்தச் சந்திப்பின்போது தற்போதைய அரசியல் சூழல் உள்ளிட்ட பல்வேறு விவகாரங்கள் குறித்து ஆலோசிக்கப்பட்டதாகத் தகவல்கள் தெரிவிக்கின்றன.
ஒரே காரில் பயணம்
ஆலோசனை நிறைவடைந்ததைத் தொடர்ந்து, விஜய்யும் ராகுல் காந்தியும் நீலாங்கரையில் உள்ள இல்லத்திலிருந்து ஒரே காரில் புறப்பட்டனர். பின்னர் பாலவாக்கத்தில் உள்ள கிரிக்கெட் வீரர் எம்.எஸ்.தோனிக்குச் சொந்தமான உணவகத்துக்குச் சென்றனர்.
முதல்வர் விஜய்யும் மக்களவை எதிர்க்கட்சித் தலைவர் ராகுல் காந்தியும் சந்தித்துப் பேசியது அரசியல் வட்டாரத்தில் கவனம் பெற்றுள்ளது. எனினும், இருவரின் ஆலோசனையில் பேசப்பட்ட விவரங்கள் குறித்து அதிகாரப்பூர்வமாக விரிவான தகவல் வெளியாகவில்லை.
