புதுடெல்லி: ஏமன் மற்றும் சோமாலியா கடல் பகுதிகளில் 22 இந்தியர்கள் உட்பட ஊழியர்களுடன் சென்ற இரண்டு கப்பல்கள் ஆயுதமேந்திய கடற்கொள்ளையர்களால் கடத்தப்பட்டுள்ளதாக தகவல் வெளியாகியுள்ளது. கடத்தப்பட்ட இந்தியர்களை பாதுகாப்பாக மீட்பதற்கான நடவடிக்கைகள் தீவிரப்படுத்தப்பட்டுள்ளன.
16 இந்தியர்களுடன் எண்ணெய் கப்பல் கடத்தல்
எரித்திரியாவைச் சேர்ந்த ‘சிபு 1’ என்ற எண்ணெய் கப்பல் ஏமன் கடல் பகுதியில் சென்று கொண்டிருந்தது. அந்தக் கப்பலில் 16 இந்தியர்கள் உட்பட 20 ஊழியர்கள் பணியாற்றி வந்தனர்.
ஏமன் கடற்கரையில் இருந்து சுமார் 136 கடல் மைல் தொலைவில் கப்பல் சென்றபோது ஆயுதமேந்திய கடற்கொள்ளையர்கள் அதில் ஏறியதாக கூறப்படுகிறது. பின்னர் அந்தக் கப்பல் சோமாலிய கடல் பகுதியை நோக்கி கடத்திச் செல்லப்பட்டதாக தகவல் வெளியாகியுள்ளது.
ஈரானில் இருந்து கச்சா எண்ணெயை ஏற்றி பல்வேறு நாடுகளுக்கு விநியோகம் செய்து வந்ததாக கூறப்படும் இந்தக் கப்பலை விடுவிப்பது தொடர்பாக அதன் நிர்வாகம் கடற்கொள்ளையர்களுடன் பேச்சுவார்த்தை நடத்தி வருவதாக தெரிவிக்கப்பட்டுள்ளது.
மற்றொரு சரக்கு கப்பலும் கடத்தல்
கேமரூன் நாட்டைச் சேர்ந்த ‘லுதுப்’ என்ற சரக்கு கப்பலும் சோமாலியாவின் புன்ட்லேண்ட் கடல் பகுதியில் கடத்தப்பட்டதாக தகவல் வெளியாகியுள்ளது.
இந்தக் கப்பலில் 6 இந்தியர்கள் உட்பட 10 ஊழியர்கள் இருந்தனர். புன்ட்லேண்டின் மரேயா பகுதியில் கப்பல் சென்று கொண்டிருந்தபோது ஆயுதமேந்திய கடற்கொள்ளையர்கள் கப்பலில் ஏறி, அதை சோமாலிய கடல் பகுதிக்கு கடத்திச் சென்றதாக கூறப்படுகிறது.
துருக்கி ராணுவம் தீவிர ரோந்து
‘லுதுப்’ கப்பலில் துருக்கி ராணுவத்துக்கு தேவையான ஆயுதங்கள் கொண்டு செல்லப்பட்டதாக தெரிவிக்கப்பட்டுள்ளது. இதையடுத்து துருக்கி போர்க்கப்பல்கள் மற்றும் ஹெலிகாப்டர்கள் சோமாலிய கடல் பகுதியில் தீவிர ரோந்து பணியில் ஈடுபட்டதாக கூறப்படுகிறது.
கடற்கொள்ளையர்கள் சென்ற படகு மீது துருக்கி ராணுவ ஹெலிகாப்டர் தாக்குதல் நடத்தியதாகவும், இதில் 4 பேர் உயிரிழந்ததாகவும் தகவல்கள் தெரிவிக்கின்றன.
22 இந்தியர்களும் பாதுகாப்பாக இருப்பதாக தகவல்
ஏமன் மற்றும் சோமாலியா கடல் பகுதிகளில் கடத்தப்பட்ட இரண்டு கப்பல்களிலும் பணியாற்றிய 22 இந்தியர்களும் தற்போது பாதுகாப்பாக இருப்பதாக மத்திய கப்பல் போக்குவரத்து வட்டாரங்கள் தெரிவித்துள்ளன.
கப்பல் நிறுவனங்கள் கடற்கொள்ளையர்களுடன் பேச்சுவார்த்தை நடத்தி வருவதுடன், இந்தியர்களை பாதுகாப்பாக மீட்பதற்கான நடவடிக்கைகளையும் மத்திய அரசு தீவிரப்படுத்தியுள்ளதாக கூறப்படுகிறது.
பெரும் தொகை கேட்பதாக தகவல்
சர்வதேச பாதுகாப்பு நிபுணர்களின் தகவலின்படி, சமீப காலங்களில் அமெரிக்கா மற்றும் சீனாவைச் சேர்ந்த சரக்கு கப்பல்களையும் சோமாலிய கடற்கொள்ளையர்கள் கடத்திய சம்பவங்கள் நடந்துள்ளன. சம்பந்தப்பட்ட கப்பல் நிறுவனங்களிடமிருந்து பெரும் தொகை பெற்ற பின்னர் அந்தக் கப்பல்கள் விடுவிக்கப்பட்டதாக கூறப்படுகிறது.
அதேபோல், தற்போது 22 இந்தியர்களுடன் கடத்தப்பட்டுள்ள இரண்டு கப்பல்களையும் விடுவிக்க கடற்கொள்ளையர்கள் பெரும் தொகையை கோருவதாக தகவல்கள் வெளியாகியுள்ளன.
இந்தியர்களை மீட்க நடவடிக்கை
கடத்தப்பட்ட இரண்டு கப்பல்களிலும் உள்ள 22 இந்தியர்களின் பாதுகாப்பை உறுதி செய்வதுடன், அவர்களை விரைவாக மீட்பதற்கான நடவடிக்கைகளை மத்திய அரசு மேற்கொண்டு வருகிறது. இந்த விவகாரம் தொடர்பாக சம்பந்தப்பட்ட கப்பல் நிறுவனங்கள் மற்றும் சர்வதேச பாதுகாப்பு அமைப்புகளுடன் தொடர்ந்து ஒருங்கிணைப்பு நடைபெற்று வருவதாக தெரிவிக்கப்பட்டுள்ளது.
