சென்னை: தமிழ்நாடு இயல், இசை, நாடக மன்றத்தின் புதிய தலைவராக நாட்டுப்புறப் பாடகர் புஷ்பவனம் குப்புசாமி நியமிக்கப்பட்டுள்ளார். இதற்கு முன்பு இப்பதவியில் இருந்த திரைப்படக் கலைஞர் வாகை சந்திரசேகருக்கு பதிலாக அவர் நியமிக்கப்பட்டுள்ளார்.
இயல், இசை, நாடக மன்றம்
மத்திய சங்கீத நாடக அகாதமியின் நோக்கங்களை மாநில அளவில் செயல்படுத்தும் வகையில், 1955-ஆம் ஆண்டு ‘தமிழ்நாடு சங்கீத நாடக சங்கம்’ என்ற பெயரில் இந்த அமைப்பு தொடங்கப்பட்டது. பின்னர் 1973-ஆம் ஆண்டு ‘தமிழ்நாடு இயல், இசை, நாடக மன்றம்’ என பெயர் மாற்றம் செய்யப்பட்டது.
தமிழகத்தின் பாரம்பரியக் கலைகள், நாட்டுப்புறக் கலை வடிவங்கள் மற்றும் கலைஞர்களைப் பாதுகாத்து வளர்ப்பதில் இந்த மன்றம் முக்கியப் பங்கு வகித்து வருகிறது.
புஷ்பவனம் குப்புசாமி
நாட்டுப்புறப் பாடகராக அறியப்படும் புஷ்பவனம் குப்புசாமி, திரைப்படப் பின்னணிப் பாடகர், பாடலாசிரியர் மற்றும் இசையமைப்பாளராகவும் பணியாற்றி வருகிறார். தமிழ் நாட்டுப்புறப் பாடல்களை மக்களிடம் கொண்டு சேர்ப்பதில் நீண்டகாலமாகப் பங்களித்து வருகிறார்.
இளையராஜா, வித்யாசாகர், யுவன் சங்கர் ராஜா, ஜி.வி. பிரகாஷ் குமார் உள்ளிட்ட இசையமைப்பாளர்களுடன் இணைந்து திரைப்படப் பாடல்களைப் பாடியுள்ளார். கலைத்துறையில் இவரது பங்களிப்பைப் பாராட்டி தமிழக அரசு ‘கலைமாமணி’ விருது வழங்கியுள்ளது.
கலைஞர்களின் நலனில் கவனம்
புதிய பொறுப்பில் நாட்டுப்புற மற்றும் பாரம்பரியக் கலைஞர்களின் நலன், வாழ்வாதாரம் மற்றும் கலை வடிவங்களின் பாதுகாப்புக்கு முக்கியத்துவம் அளிக்கப்படும் என எதிர்பார்க்கப்படுகிறது.
