திருப்பூர் மாவட்டத்துக்கு என்ன தேவை? தாராபுரத்தில் விஜய் பட்டியல்

தாராபுரம் சட்டப்பேரவைத் தொகுதி இடைத்தேர்தலை முன்னிட்டு, தவெக வேட்பாளர் சத்தியபாமாவை ஆதரித்து நடைபெற்ற பிரசாரக் கூட்டத்தில் முதல்வரும் தவெக தலைவருமான விஜய் பேசினார். அப்போது, திருப்பூர் மாவட்டத்துக்கான பல்வேறு திட்டங்கள் மற்றும் மாவட்டத்தில் நிலவும் அடிப்படைத் தேவைகள் குறித்து அவர் பட்டியலிட்டார்.

திருப்பூர் மாவட்டத்துக்கான திட்டங்கள்

பிரசாரக் கூட்டத்தில் பேசிய விஜய், வரும் பொங்கல் முதல் ஆண்டுக்கு 3 சிலிண்டர்கள் வழங்கும் திட்டம் செயல்படுத்தப்படும் என்று தெரிவித்தார்.

முதல்வர் காப்பீட்டுத் தொகை ரூ.5 லட்சத்தில் இருந்து ரூ.25 லட்சமாக உயர்த்தப்பட்டுள்ளதாகவும், முதியோர் காப்பீட்டுத் திட்டம் அறிமுகப்படுத்தப்பட்டுள்ளதாகவும் அவர் கூறினார். அம்மா உணவகங்கள் சீரமைக்கப்பட்டுள்ளதாகவும், மகளிர் தொழில் முனைவோருக்காக ‘சிங்கப்பெண்’ திட்டம் கொண்டுவரப்பட்டுள்ளதாகவும் தெரிவித்தார்.

பெண்கள் பாதுகாப்பு, முதலீடு குறித்து பேச்சு

பெண்களின் பாதுகாப்பை உறுதி செய்வதற்காக சிறப்புப் படை அமைக்கப்பட்டு, புதிய பணியிடங்கள் உருவாக்கப்பட்டுள்ளதாக விஜய் தெரிவித்தார்.

மேலும், ஆட்சிக்கு வந்த பிறகு ஊழல் மற்றும் லஞ்சமற்ற நிர்வாகத்தை மேற்கொண்டு வருவதாகவும், 100 நாள்களில் ரூ.1 லட்சம் கோடி முதலீடு ஈர்க்கப்பட்டுள்ளதாகவும் அவர் கூறினார். நெல் மற்றும் பால் கொள்முதல் விலை உயர்த்தப்பட்டுள்ளதாகவும், 200 யூனிட் மின்சாரம் வழங்கப்படுவதாகவும் குறிப்பிட்டார்.

தேர்தல் வாக்குறுதிகளை படிப்படியாக நிறைவேற்றி வருவதாகவும், ‘தாய்மாமன்’ திட்டத்தின் கீழ் மோதிரம் வழங்கப்பட்டுள்ளதாகவும் விஜய் தெரிவித்தார்.

திருப்பூரில் அடிப்படை கட்டமைப்பு தேவைகள்

திருப்பூர் மாவட்டத்தில் உயிரியல் பாதுகாப்பு நிலையம் அமைக்கப்படவுள்ளதாக விஜய் தெரிவித்தார். அதேவேளையில், மாவட்டத்தில் பல்வேறு அடிப்படை கட்டமைப்புப் பணிகள் இன்னும் நிறைவேற்றப்பட வேண்டியுள்ளதாகவும் அவர் கூறினார்.

இலவச வீட்டுமனைப் பட்டா வழங்கப்படாத நிலை, கால்வாய்கள் தூர்வாரப்பட வேண்டிய தேவை, பாசன நீர் கிடைப்பதில் விவசாயிகள் எதிர்கொள்ளும் சிரமங்கள் உள்ளிட்ட பிரச்னைகளை அவர் சுட்டிக்காட்டினார். தாராபுரம் பொருளாதார ரீதியாக பின்தங்கியுள்ளதாகவும் விஜய் தனது உரையில் குறிப்பிட்டார்.

மருத்துவக் கல்லூரி மருத்துவமனைக்கு ரூ.72 கோடி

திருப்பூர் அரசு மருத்துவக் கல்லூரி மருத்துவமனையில் கூடுதல் கட்டடம் அமைப்பதற்காக ரூ.72 கோடியில் நடவடிக்கை எடுக்கப்படும் என்றும் விஜய் தெரிவித்தார்.

தாராபுரம் இடைத்தேர்தல் பிரசாரக் கூட்டத்தில் திருப்பூர் மாவட்டத்தின் வளர்ச்சித் தேவைகள் மற்றும் செயல்படுத்தப்பட்டதாகக் கூறப்படும் திட்டங்கள் குறித்து விஜய் இந்த தகவல்களை வெளியிட்டார்.