தேவர் ஜெயந்தி: நந்தனத்தில் தேவர் சிலைக்கு மாலை அணிவித்து முதல்வர் விஜய் மரியாதை

சென்னை: பசும்பொன் முத்துராமலிங்கத் தேவரின் 119-வது பிறந்தநாள் மற்றும் 64-வது குருபூஜையை முன்னிட்டு, சென்னை நந்தனத்தில் உள்ள அவரது சிலைக்கு தமிழக முதல்வர் விஜய் மாலை அணிவித்து மரியாதை செலுத்தினார்.

அமைச்சர்களும் மரியாதை

தேவர் ஜெயந்தி மற்றும் குருபூஜை விழாவை முன்னிட்டு பல்வேறு அரசியல் கட்சித் தலைவர்கள் தேவருக்கு மரியாதை செலுத்தி வருகின்றனர். சென்னை நந்தனத்தில் நடைபெற்ற நிகழ்ச்சியில் சட்டப்பேரவைத் தலைவர் ஜே.சி.டி. பிரபாகர் மற்றும் அமைச்சர்கள் ஆதவ் அர்ஜுனா, புஸ்ஸி ஆனந்த், செங்கோட்டையன் ஆகியோரும் கலந்து கொண்டு தேவரின் திருவுருவப் படத்திற்கு மலர் தூவி மரியாதை செலுத்தினர்.

முதல்வரைக் காண திரண்ட பொதுமக்கள்

முதல்வர் விஜய் வருகையை அறிந்து நந்தனம் பகுதியில் ஏராளமான பொதுமக்கள் திரண்டனர். அங்கு வந்த முதல்வர், பொதுமக்களைப் பார்த்து கையசைத்தபடி சிறிது தூரம் நடந்து சென்றார். பின்னர் காரில் ஏறி தலைமைச் செயலகத்துக்குப் புறப்பட்டுச் சென்றார்.

முதல்வரின் வருகையை முன்னிட்டு அப்பகுதியில் போலீஸ் பாதுகாப்பு பலப்படுத்தப்பட்டிருந்தது.

பசும்பொன் பயணம் தவிர்ப்பு

முதல்வர் விஜய் தேவர் ஜெயந்தியை முன்னிட்டு ராமநாதபுரம் மாவட்டம் பசும்பொன்னுக்குச் செல்லத் திட்டமிட்டிருந்ததாக முன்னதாகத் தகவல் வெளியானது. ஆனால், பின்னர் அவரது பயணத் திட்டம் மாற்றப்பட்டது.

பசும்பொன் குருபூஜையில் ஆண்டுதோறும் லட்சக்கணக்கானோர் கூடுவதால் பாதுகாப்பு ஏற்பாடுகள் தொடர்பாக ஆலோசனைகள் வழங்கப்பட்டதாகவும், அதன் அடிப்படையில் முதல்வரின் பயணம் தவிர்க்கப்பட்டதாகவும் தவெக வட்டாரங்கள் தெரிவித்தனர்.

இதையடுத்து, சென்னை நந்தனத்தில் உள்ள தேவர் சிலைக்கு மாலை அணிவித்து முதல்வர் விஜய் மரியாதை செலுத்தினார்.