மாணவர்களுடன் குழந்தைகள் தினம் கொண்டாடும் முதல்வர் விஜய் கொளத்தூர் பள்ளியில் நாளை சிறப்பு நிகழ்ச்சி

சென்னை: குழந்தைகள் தினத்தை முன்னிட்டு சென்னை கொளத்தூர் சட்டமன்றத் தொகுதியில் உள்ள நடுநிலைப் பள்ளியில் நாளை (நவம்பர் 13) நடைபெறும் விழாவில் தமிழக முதல்வர் விஜய் பங்கேற்க உள்ளார். அப்போது பள்ளி மாணவர்களுக்கு கேக் வழங்கி அவர்களுடன் குழந்தைகள் தினத்தைக் கொண்டாடத் திட்டமிட்டுள்ளார்.

கொளத்தூர் பள்ளியில் முதல்வர் விஜய்

இந்தியாவில் ஆண்டுதோறும் நவம்பர் 14ஆம் தேதி குழந்தைகள் தினம் கொண்டாடப்படுகிறது. இந்த ஆண்டு நவம்பர் 14 சனிக்கிழமை வருவதால், தமிழகத்தில் அரசு பள்ளிகளில் நவம்பர் 13ஆம் தேதியே குழந்தைகள் தின நிகழ்ச்சிகளை நடத்த பள்ளிக்கல்வித்துறை ஏற்பாடு செய்துள்ளது.

இதன் ஒரு பகுதியாக சென்னை கொளத்தூர் சட்டமன்றத் தொகுதியில் உள்ள நடுநிலைப் பள்ளியில் நடைபெறும் நிகழ்ச்சியில் முதல்வர் விஜய் பங்கேற்க உள்ளார். அங்கு மாணவர்களுக்கு கேக் வழங்கி குழந்தைகள் தின வாழ்த்துகளைத் தெரிவிக்க உள்ளதாக தினத்தந்தி செய்தி வெளியிட்டுள்ளது.

61.84 லட்சம் மாணவர்களுக்கு கேக்

தமிழகம் முழுவதும் அரசு மற்றும் அரசு உதவி பெறும் பள்ளிகளில் பயிலும் மாணவர்களுக்கு குழந்தைகள் தினத்தை முன்னிட்டு கேக் வழங்க தமிழக அரசு முடிவு செய்துள்ளது.

இதற்காக 61,84,566 மாணவர்களுக்கு கேக் மற்றும் முதல்வரின் கையொப்பமிட்ட வாழ்த்து அட்டைகளை வழங்க ரூ.9.27 கோடி நிதி ஒதுக்கப்பட்டுள்ளது. ஒவ்வொரு மாணவருக்கும் 45 கிராம் எடையுள்ள கேக் வழங்க ஏற்பாடு செய்யப்பட்டுள்ளது.

12 மாவட்ட மாணவர்களுக்கு கூடுதல் கேக்

மயிலாடுதுறை, சேலம், தஞ்சாவூர், மதுரை, திருவண்ணாமலை, திருச்சி, கோவை, திருப்பூர், நீலகிரி, ஈரோடு, நாமக்கல் மற்றும் கரூர் ஆகிய 12 மாவட்டங்களில் உள்ள மாணவர்களுக்கு மொத்தம் 45 கிராம் எடையுள்ள இரண்டு கேக் பாக்கெட்டுகள் வழங்கப்பட உள்ளன.

மற்ற மாவட்டங்களில் ஒவ்வொரு மாணவருக்கும் 45 கிராம் எடையுள்ள ஒரு கேக் பாக்கெட் வழங்கப்படும். கேக்குகளின் தரத்தை உறுதி செய்ய உணவுப் பாதுகாப்புத்துறை ஆய்வு செய்து சான்றளித்துள்ளது.

நாளை பள்ளிகளில் குழந்தைகள் தின விழா

கேக் விநியோகம் தொடர்பான ஏற்பாடுகளை மாவட்ட முதன்மைக் கல்வி அலுவலர்கள், மாவட்டக் கல்வி அலுவலர்கள் மற்றும் வட்டாரக் கல்வி அலுவலர்கள் ஒருங்கிணைத்து வருகின்றனர். பள்ளிகளுக்கு கேக்குகள் அனுப்பப்பட்டு பாதுகாப்பாகச் சேமிக்கவும் அறிவுறுத்தப்பட்டுள்ளது.

மாணவர்களுக்கு கேக் வழங்குவதுடன் முதல்வரின் வாழ்த்து அட்டைகளும் வழங்கப்பட உள்ளன. கொளத்தூர் பள்ளியில் முதல்வர் விஜய் நேரடியாகப் பங்கேற்க உள்ளதால், அந்த நிகழ்ச்சி குறித்த எதிர்பார்ப்பு மாணவர்கள் மற்றும் ஆசிரியர்கள் மத்தியில் ஏற்பட்டுள்ளது.