‘காமராஜ்’ திரைப்படத்தை நாட்டுடைமையாக்க வேண்டும்; முதல்வர் விஜயிடம் இயக்குநர் ஏ.ஜே. பாலகிருஷ்ணன் கோரிக்கை

சென்னை: பெருந்தலைவர் காமராஜரின் வாழ்க்கை வரலாற்றை அடிப்படையாகக் கொண்டு உருவாக்கப்பட்ட 'காமராஜ்' திரைப்படத்தை தமிழக அரசு நாட்டுடைமையாக்க வேண்டும் என்று அதன் இயக்குநர் ஏ.ஜே. பாலகிருஷ்ணன் தமிழக முதல்வர் விஜயிடம் கோரிக்கை விடுத்துள்ளார். இதுகுறித்து அவர் வெளியிட்டுள்ள அறிக்கையில், காமராஜரின் அரசியல் மற்றும் சமூகப் பணிகளை அடுத்த தலைமுறையினருக்கு கொண்டு சேர்க்கும் நோக்கில் 'காமராஜ்' திரைப்படம் தயாரிக்கப்பட்டதாக தெரிவித்துள்ளார். திரைப்படம் பல்வேறு தரப்பினரிடமிருந்து பாராட்டுகளைப் பெற்றாலும், அதை தயாரிக்க பெற்ற கடன்களை முழுமையாக திருப்பிச் செலுத்த முடியாத நிலை ஏற்பட்டுள்ளதாகவும் கூறியுள்ளார். மேலும், வரலாற்று முக்கியத்துவம் வாய்ந்த தலைவர்களின் வாழ்க்கையைப் பதிவு செய்த திரைப்படங்களுக்கு கடந்த காலங்களில் அரசுகள் நிதி மற்றும் பிற உதவிகளை வழங்கியுள்ளதை சுட்டிக்காட்டிய அவர், அதேபோல் காமராஜரின் வாழ்க்கையை எடுத்துரைக்கும் இந்தப் படத்திற்கும் தமிழக அரசு ஆதரவு அளிக்க வேண்டும் என வலியுறுத்தியுள்ளார். குறிப்பாக, 'காமராஜ்' திரைப்படத்தை நாட்டுடைமையாக்கி, உலகம் முழுவதும் உள்ள தமிழர்கள் எளிதாகக் காணும் வகையில் பாதுகாத்து பரப்ப தமிழக அரசு நடவடிக்கை எடுக்க வேண்டும் என்றும் அவர் தனது கோரிக்கையில் தெரிவித்துள்ளார்.