சென்னை: தமிழக சட்டப்பேரவையில் தொழில், முதலீட்டு ஊக்குவிப்பு மற்றும் வர்த்தகத் துறையின் 2026-27ஆம் ஆண்டுக்கான மானியக் கோரிக்கையின்போது 23 முக்கிய அறிவிப்புகள் வெளியிடப்பட்டுள்ளன. புதிய தொழிற்பூங்காக்கள், வேலைவாய்ப்பு, முதலீடு, MSME நிறுவனங்களுக்கான கடன், பெண்கள் தொழில் முனைவோர் மற்றும் தொழில்நுட்ப வளர்ச்சி உள்ளிட்ட பல்வேறு அம்சங்கள் இந்த அறிவிப்புகளில் இடம்பெற்றுள்ளன.
கங்கைகொண்டான் சிப்காட் பூங்காவில் தொழிலாளர் தங்குமிடம்
கங்கைகொண்டான் சிப்காட் தொழிற்பூங்காவில் 2,500-க்கும் மேற்பட்ட தொழிலாளர்கள் தங்கும் வகையில் இரண்டாம் கட்டமாக தங்குமிட வசதி ஏற்படுத்தப்பட உள்ளது. பொது மற்றும் தனியார் பங்களிப்புடன் ரூ.130 கோடி மதிப்பீட்டில் இந்தத் திட்டம் செயல்படுத்தப்படும்.
மேலும், ஏற்கெனவே உள்ள சிப்காட் தொழிற்பூங்காக்களை சுற்றுச்சூழலுக்கு உகந்த தொழிற்பூங்காக்களாக மேம்படுத்த சுமார் ரூ.100 கோடி செலவிடப்பட உள்ளது. பணியாளர்களுக்கான குழந்தைகள் பராமரிப்பு மையங்கள், தீயணைப்பு நிலையங்கள் மற்றும் சுகாதார மையங்களும் அமைக்கப்படும்.
ரூ.224 கோடியில் Plug & Play தொழிற்கூடங்கள்
கங்கைகொண்டான் மற்றும் தூத்துக்குடி சிப்காட் தொழிற்பூங்காக்களில் தொழில் நிறுவனங்கள் விரைவாக உற்பத்தியைத் தொடங்கும் வகையில் Plug & Play தொழிற்கூடங்கள் உருவாக்கப்பட உள்ளன. இதற்காக ரூ.224 கோடி திட்ட மதிப்பீடு நிர்ணயிக்கப்பட்டுள்ளது.
சிப்காட் தொழில்மனைகளின் ஒதுக்கீட்டை மேலும் வெளிப்படையாக்கும் வகையில், ஒதுக்கப்பட்ட மனைகள், காலி மனைகள் மற்றும் புதிதாக உருவாகும் தொழிற்பூங்காக்களில் உள்ள நில விவரங்கள் அனைத்தையும் ஒருங்கிணைத்த டிஜிட்டல் தளம் உருவாக்கப்படும். முதலீட்டாளர்கள் தொழிற்பூங்காக்களின் அமைப்பு மற்றும் உட்கட்டமைப்பை எளிதாக புரிந்துகொள்ள முப்பரிமாண காட்சிப்படுத்தல் வசதியும் ஏற்படுத்தப்படும்.
தூத்துக்குடியில் இரண்டு புதிய தொழிற்பூங்காக்கள்
- முடிவைத்தானேந்தல்: சுமார் 2,570 ஏக்கரில் தொழிற்பூங்கா அமைத்து ரூ.5,000 கோடி முதலீட்டை ஈர்க்கவும் 20,000 வேலைவாய்ப்புகளை உருவாக்கவும் திட்டம்.
- சில்லாநத்தம்: சுமார் 1,294 ஏக்கரில் மின்சார வாகன உற்பத்தி தொழிற்பூங்கா அமைத்து ரூ.7,000 கோடி முதலீடு மற்றும் 10,000 வேலைவாய்ப்புகளை உருவாக்க இலக்கு.
விழுப்புரம், நாமக்கல்லிலும் சிப்காட் தொழிற்பூங்காக்கள்
விழுப்புரம் மாவட்டம் ஓமந்தூரில் சுமார் 229 ஏக்கரில் சிப்காட் தொழிற்பூங்கா அமைக்கப்பட உள்ளது. ரூ.1,000 கோடி முதலீட்டை ஈர்த்து 3,200 வேலைவாய்ப்புகளை உருவாக்கும் வகையில் திட்டம் வடிவமைக்கப்பட்டுள்ளது.
நாமக்கல் மாவட்டம் லத்துவாடியில் சுமார் 245 ஏக்கரில் புதிய சிப்காட் தொழிற்பூங்கா அமைக்கப்பட உள்ளது. ரூ.1,000 கோடி முதலீட்டுடன் 3,500 வேலைவாய்ப்புகளை உருவாக்க இலக்கு நிர்ணயிக்கப்பட்டுள்ளது.
ஜவுளி மற்றும் பாதுகாப்பு துறைக்கு புதிய வசதிகள்
புதுக்கோட்டை மாவட்டம் ஆவுடையார்கோவில் வட்டத்தில் உள்ள திரப்பிடங்கி பகுதியில், ஜவுளி தொழில் கூட்டமைப்புகளுடன் இணைந்து ரூ.25 கோடி மதிப்பீட்டில் ஆயத்த தொழிற்கூட வசதிகளுடன் கூடிய சிறிய ஜவுளிப்பூங்கா அமைக்கப்பட உள்ளது.
சிப்காட் தொழிற்பூங்காக்களில் பாதுகாப்பு விதிமுறைகளை கண்காணிக்கும் வகையில் மொபைல் செயலி மற்றும் இணையதளத்துடன் கூடிய டிஜிட்டல் கண்காணிப்பு அமைப்பும் அறிமுகப்படுத்தப்பட உள்ளது.
Quantum Safe TN திட்டத்துக்கு ஆய்வு
தமிழகத்தை ‘Quantum Safe TN’ மாநிலமாக உருவாக்குவதற்கான சாத்தியக்கூறுகள் குறித்து சுமார் ரூ.1 கோடி மதிப்பீட்டில் ஆய்வு மேற்கொள்ளப்படும். நிதிநுட்பம், உலகளாவிய திறன் மையங்கள், வான்வெளி, விண்வெளி மற்றும் பாதுகாப்பு நிறுவனங்களின் டிஜிட்டல் தரவுகளுக்கு மேம்பட்ட பாதுகாப்பை வழங்குவதற்கான தொழில்நுட்ப கட்டமைப்பை உருவாக்குவது இதன் நோக்கமாகும்.
சிவகாசி பட்டாசுத் தொழிலுக்கு பொது வசதி மையம்
சிவகாசி பட்டாசுத் தொழிலின் பாதுகாப்பு, தொழில்நுட்ப பயன்பாடு, நிலைத்தன்மை மற்றும் திறன் மேம்பாட்டை வலுப்படுத்தும் வகையில் ‘Sivakasi Pyrotechnics Common Facility Centre’ அமைப்பதற்கான விரிவான திட்ட அறிக்கை தயாரிக்கப்படும். இதற்காக ரூ.2 கோடி மதிப்பீடு செய்யப்பட்டுள்ளது.
செமிகண்டக்டர் முதலீட்டுக்கு புதிய ஊக்கத்திட்டம்
தமிழகத்தில் செமிகண்டக்டர் துறையில் முதலீடுகளை ஈர்க்கும் வகையில், மாநிலத்தில் அமைய உள்ள நிறுவனங்களின் தேவைகளுக்கு ஏற்ப பிரத்யேக ஊக்கத்தொகைத் திட்டம் அறிமுகப்படுத்தப்படும் என அறிவிக்கப்பட்டுள்ளது.
மேலும், தமிழகத்தின் ஏற்றுமதி வளர்ச்சி, பசுமை மாற்றம், உலகளாவிய போட்டித்திறன் மற்றும் எதிர்கால தொழில்நுட்பங்களின் வளர்ச்சியை ஆய்வு செய்ய ஆலோசனைக் குழு அமைக்கப்படும்.
GCC வளர்ச்சிக்கு தனி வழித்தடம்
உலகளாவிய திறன் மையங்கள் எனப்படும் GCC துறையில் தமிழகத்தின் நிலையை மேலும் வலுப்படுத்தும் வகையில் ‘தமிழ்நாடு GCC வழித்தடம் மற்றும் வளர்ச்சித் திட்டம்’ உருவாக்கப்பட உள்ளது.
அனைத்து மாவட்டங்களிலும் மாவட்ட வாரியான தொழில் வளர்ச்சித் திட்டங்களை செயல்படுத்துவதற்காக மாநில அளவிலான கண்காணிப்பு அமைப்பும் ஏற்படுத்தப்படும்.
500 MSME நிறுவனங்களுக்கு ரூ.600 கோடி நிதியுதவி
தமிழ்நாடு தொழில் முதலீட்டுக் கழகத்தின் Bill Finance திட்டம், மேலும் பல அரசு நிறுவனங்கள் மற்றும் உள்ளாட்சி அமைப்புகளுக்கு விரிவுபடுத்தப்பட உள்ளது. இதன் மூலம் 500 MSME நிறுவனங்கள் மொத்தம் ரூ.600 கோடி அளவிலான நிதியுதவியைப் பெறும் வகையில் திட்டம் செயல்படுத்தப்படும்.
MSME நிறுவனங்களுக்கு விரைவாகவும் வெளிப்படையாகவும் கடன் வழங்கும் நோக்கில், தமிழ்நாடு தொழில் முதலீட்டுக் கழகத்தின் கடன் வழங்கும் நடைமுறை முழுமையாக மின்னணுமயமாக்கப்பட உள்ளது.
பெண்கள் தொழில் முனைவோருக்கு ரூ.500 கோடி கடனுதவி
‘வெற்றி மகளிர் தொழில் முனைவோர் மேம்பாட்டுத் திட்டம்’ என்ற புதிய திட்டம் மூலம் பெண்கள் தொழில் தொடங்குவதற்கான பயிற்சி, குறைந்த வட்டி கடன், கடன் பங்களிப்பில் சலுகை மற்றும் பிணையச் சொத்து தொடர்பான சலுகைகள் வழங்கப்பட உள்ளன.
தமிழ்நாடு தொழில் முதலீட்டுக் கழகம் மூலம் ரூ.500 கோடி கடனுதவி வழங்க இலக்கு நிர்ணயிக்கப்பட்டுள்ளது. 500-க்கும் மேற்பட்ட பெண் தொழில் முனைவோர் இதன் மூலம் பயன்பெற உள்ளனர்.
‘வெற்றி நோட்டு புத்தகங்கள்’ உற்பத்தி அலகு
தமிழ்நாடு செய்தித்தாள் காகித நிறுவனம் சார்பில் கரூர் மாவட்டம் மாயனூரில் ஆண்டுக்கு 5,000 மெட்ரிக் டன் உற்பத்தித் திறன் கொண்ட ‘வெற்றி நோட்டு புத்தகங்கள்’ தயாரிப்பு அலகு ரூ.6 கோடி மதிப்பீட்டில் அமைக்கப்பட உள்ளது.
மேலும், நிறுவனத்தின் புதுப்பிக்கத்தக்க எரிசக்தி தேவையை பூர்த்தி செய்ய திருநெல்வேலியில் ஏற்கெனவே செயல்பட்டு வரும் காற்றாலைப் பண்ணைகளை புதுப்பிப்பதுடன், சூரிய மின் உற்பத்தி நிலையம் அமைப்பதற்கான நடவடிக்கைகளும் மேற்கொள்ளப்படும்.
உப்பளத் தொழிலாளர்களுக்கு நிவாரணத் தொகை உயர்வு
உப்பளத் தொழிலாளர்களின் குடும்பங்களுக்கு வழங்கப்படும் மழைக்கால நிவாரணத் தொகை ஆண்டுக்கு ரூ.5,000-லிருந்து ரூ.7,000-ஆக உயர்த்தி வழங்கப்படும் என அறிவிக்கப்பட்டுள்ளது.
தமிழ்நாடு உப்பு நிறுவனம் தயாரிக்கும் இருவித செறிவூட்டப்பட்ட உப்பு, ‘வெற்றி இருவித செறிவூட்டப்பட்ட உப்பு’ என்ற பெயரில் நியாய விலைக் கடைகள் மற்றும் வெளிச்சந்தைகளில் விற்பனை செய்யப்பட உள்ளது.
தொழில் வளர்ச்சிக்கு முக்கியத்துவம்
புதிய தொழிற்பூங்காக்கள் உருவாக்கம், முதலீடுகளை ஈர்த்தல், வேலைவாய்ப்புகளை அதிகரித்தல், MSME நிறுவனங்களுக்கு நிதி ஆதரவு, பெண்கள் தொழில் முனைவு மற்றும் புதிய தொழில்நுட்பங்களை ஊக்குவித்தல் என தமிழக தொழில் துறையின் பல்வேறு பகுதிகளை உள்ளடக்கியதாக இந்த 23 அறிவிப்புகள் அமைந்துள்ளன.
