சென்னை: மதுராந்தகம் மற்றும் தாராபுரம் சட்டப்பேரவைத் தொகுதிகளுக்கு நடைபெற உள்ள இடைத்தேர்தலை முன்னிட்டு, தமிழக வெற்றிக் கழகம் சார்பில் தேர்தல் பணிகளை மேற்கொள்வதற்கான பொறுப்பாளர்கள் மற்றும் கண்காணிப்பாளர்களை கட்சித் தலைவரும் தமிழக முதல்வருமான விஜய் நியமித்துள்ளார்.
வரும் அக்டோபர் 6-ம் தேதி நடைபெற உள்ள இந்த இரு தொகுதிகளுக்கான இடைத்தேர்தல் பணிகளை ஒருங்கிணைத்து மேற்கொள்ள தேர்தல் பணிக்குழுவும், பணிகளை கண்காணிக்க தேர்தல் கண்காணிப்பாளர்களும் நியமிக்கப்பட்டுள்ளதாக விஜய் வெளியிட்டுள்ள அறிக்கையில் தெரிவித்துள்ளார்.
தேர்தல் கண்காணிப்பாளர்கள் நியமனம்
மதுராந்தகம் மற்றும் தாராபுரம் ஆகிய இரண்டு தொகுதிகளுக்கான தேர்தல் பணிகளை கண்காணிக்கும் பொறுப்பு அமைச்சர்கள் ஆனந்த், செங்கோட்டையன் மற்றும் நிர்மல் குமார் ஆகியோருக்கு வழங்கப்பட்டுள்ளது.
இவர்கள் இரு தொகுதிகளிலும் நடைபெறும் தேர்தல் பணிகளைத் தொடர்ந்து கண்காணித்து, கட்சி சார்பில் மேற்கொள்ளப்படும் நடவடிக்கைகளை ஒருங்கிணைப்பார்கள் எனத் தெரிவிக்கப்பட்டுள்ளது.
மதுராந்தகம் தேர்தல் பணிக்குழு
மதுராந்தகம் தொகுதியின் தேர்தல் பணிக்குழு பொறுப்பாளராக அமைச்சர் ஆதவ் அர்ஜுனா நியமிக்கப்பட்டுள்ளார். அவருடன் இணைப் பொறுப்பாளர்களாக அமைச்சர்கள் பி. ராஜ்குமார், தென்னரசு மற்றும் வினோத் ஆகியோர் நியமிக்கப்பட்டுள்ளனர்.
துணைப் பொறுப்பாளர்களாக சோழிங்கநல்லூர் எம்எல்ஏ சரவணமூர்த்தி, செங்கல்பட்டு எம்எல்ஏ தியாகராஜன், திருப்போரூர் எம்எல்ஏ விஜயராஜ், பல்லாவரம் எம்எல்ஏ காமாட்சி மற்றும் செங்கல்பட்டு தெற்கு மாவட்டக் கழகச் செயலாளர் பாலாஜி என்கிற மணிகண்டன் ஆகியோர் நியமிக்கப்பட்டுள்ளனர்.
தாராபுரம் தேர்தல் பணிக்குழு
தாராபுரம் சட்டப்பேரவைத் தொகுதியின் தேர்தல் பணிக்குழு பொறுப்பாளராக அமைச்சர் அருண்ராஜ் நியமிக்கப்பட்டுள்ளார். இணைப் பொறுப்பாளர்களாக அமைச்சர்கள் விஜய் பாலாஜி, விஜயலட்சுமி மற்றும் லோகேஷ் தமிழ்ச்செல்வன் ஆகியோர் நியமிக்கப்பட்டுள்ளனர்.
துணைப் பொறுப்பாளர்களாக திருப்பூர் தெற்கு தொகுதி எம்எல்ஏ பாலமுருகன், திருப்பூர் வடக்கு தொகுதி எம்எல்ஏ சத்தியபாமா, பல்லடம் எம்எல்ஏ ராம்குமார், நாமக்கல் எம்எல்ஏ திலீப் மற்றும் கிருஷ்ணராயபுரம் எம்எல்ஏ சத்யா ஆகியோர் நியமிக்கப்பட்டுள்ளனர்.
இடைத்தேர்தல் பணிகளில் தீவிரம்
நியமிக்கப்பட்டுள்ள தேர்தல் பணிக்குழுவினர் தங்களுக்கு ஒதுக்கப்பட்டுள்ள சட்டப்பேரவைத் தொகுதிகளில் இடைத்தேர்தல் தொடர்பான பணிகளை மேற்கொள்வார்கள். தேர்தல் கண்காணிப்பாளர்கள், மதுராந்தகம் மற்றும் தாராபுரம் ஆகிய இரண்டு தொகுதிகளிலும் நடைபெறும் தேர்தல் பணிகளை மேற்பார்வையிடுவார்கள்.
சம்பந்தப்பட்ட தொகுதிகளுக்கு உட்பட்ட கட்சித் தொண்டர்கள் அனைவரும் தேர்தல் பொறுப்பாளர்களுக்கு முழு ஒத்துழைப்பு வழங்க வேண்டும் என விஜய் கேட்டுக்கொண்டுள்ளார்.
“வெற்றிச் சின்னமான விசில் மீண்டும் வாகை சூட வேண்டும்”
இடைத்தேர்தலில் தமிழக வெற்றிக் கழகத்தின் வெற்றியை உறுதி செய்ய அனைவரும் தீவிரமாக தேர்தல் பணியாற்ற வேண்டும் என விஜய் தெரிவித்துள்ளார்.
இடைத்தேர்தல் வரலாற்றிலேயே அதிக வாக்குகள் வித்தியாசத்தில் தமிழக வெற்றிக் கழக வேட்பாளர்கள் வெற்றி பெற்றனர் என்ற புதிய வரலாற்றை உருவாக்கும் வகையில் கட்சியினர் செயல்பட வேண்டும் என்றும் அவர் வலியுறுத்தியுள்ளார்.
மக்கள் சந்திப்பு நிகழ்ச்சிகள்
மதுராந்தகம் மற்றும் தாராபுரம் தொகுதிகளில் கட்சி வேட்பாளர்களுக்கு ஆதரவாக தமிழக வெற்றிக் கழகத்தின் சார்பில் மக்கள் சந்திப்பு நிகழ்ச்சிகள் விரைவில் முன்னெடுக்கப்படும் என்றும் விஜய் தெரிவித்துள்ளார்.
இரு தொகுதிகளிலும் தேர்தல் பணிகளை ஒருங்கிணைக்கும் வகையில் பொறுப்பாளர்கள் நியமிக்கப்பட்டுள்ள நிலையில், இடைத்தேர்தல் களத்தில் தவெகவின் பிரசார நடவடிக்கைகள் அடுத்தகட்டமாக தீவிரமடையும் என எதிர்பார்க்கப்படுகிறது.
