புதுடெல்லி: எஸ்ஐஆர் உள்ளிட்ட தேர்தல் ஆணையம் தொடர்பான விவகாரங்களில் எதிர்ப்பு தெரிவித்து காங்கிரஸ் உள்ளிட்ட இண்டி கூட்டணி கட்சிகள் டெல்லியில் தொடர்ந்து போராட்டம் நடத்தி வருகின்றன. இதன் தொடர்ச்சியாக ஜந்தர் மந்தர் நோக்கிச் செல்ல முயன்ற எதிர்க்கட்சி எம்.பி.க்களை போலீசார் தடுத்து நிறுத்தினர். தடையை மீறி செல்ல முயன்ற ராகுல் காந்தி, பிரியங்கா காந்தி உள்ளிட்டோர் கைது செய்யப்பட்டனர்.
தேர்தல் ஆணைய அலுவலகம் நோக்கி பேரணி
தேர்தல் ஆணையம் தொடர்பான விவகாரங்களை முன்வைத்து நேற்று டெல்லியில் எதிர்க்கட்சியினர் பேரணி நடத்தினர். தேர்தல் கமிஷன் அலுவலகம் நோக்கிச் சென்ற அவர்களை போலீசார் தடுத்து நிறுத்தினர். தடையை மீறி போராட்டத்தில் ஈடுபட்ட ராகுல் காந்தி, பிரியங்கா காந்தி உள்ளிட்டோர் கைது செய்யப்பட்டு பின்னர் விடுவிக்கப்பட்டனர்.
ஜந்தர் மந்தர் நோக்கி செல்ல முயற்சி
இதையடுத்து அடுத்தகட்ட போராட்டம் தொடர்பாக காங்கிரஸ் தலைவர் மல்லிகார்ஜுன கார்கே ஏற்பாட்டில் டெல்லியில் இண்டி கூட்டணி தலைவர்கள் மற்றும் எம்.பி.க்கள் ஆலோசனை நடத்தினர். பின்னர் ஜன்பத் சாலையில் உள்ள உணவகத்தில் இருந்து பேருந்தில் ஜந்தர் மந்தர் நோக்கிச் செல்ல அவர்கள் முயன்றனர்.
அப்போது போலீசார் பேருந்தை தடுத்து நிறுத்தினர். ஜந்தர் மந்தரில் போராட்டம் நடத்த முன் அனுமதி பெற வேண்டும் என்றும், அதற்காக துணை கமிஷனரிடம் 10 நாட்களுக்கு முன்பாக விண்ணப்பிக்க வேண்டும் என்றும் போலீசார் தெரிவித்ததாக கூறப்படுகிறது.
போலீசாருடன் தள்ளுமுள்ளு
இதனால் அங்கு கூடியிருந்த இண்டி கூட்டணி எம்.பி.க்களுக்கும் போலீசாருக்கும் இடையே தள்ளுமுள்ளு ஏற்பட்டது. தொடர்ந்து சிலர் ஜந்தர் மந்தர் நோக்கிச் செல்ல முயன்றதாக தெரிவிக்கப்பட்டுள்ளது.
ராகுல், பிரியங்கா கைது
இந்த நிலையில் பேருந்தில் இருந்து இறங்கிய பிரியங்கா காந்தி சாலையில் அமர்ந்து போராட்டத்தில் ஈடுபட்டார். போலீசார் அங்கிருந்து செல்லுமாறு அறிவுறுத்தியபோதும் அவர் போராட்டத்தைத் தொடர்ந்ததாக கூறப்படுகிறது. இதையடுத்து பெண் போலீசார் அவரை கைது செய்து அழைத்துச் சென்றனர்.
இதேபோல், போலீஸ் தடையை மீறி செல்ல முயன்ற ராகுல் காந்தியையும் போலீசார் கைது செய்தனர். அவரை போலீசார் தூக்கிச் சென்று வேனில் ஏற்றியதாக தெரிவிக்கப்பட்டுள்ளது.
தேர்தல் ஆணையம் தொடர்பான விவகாரங்களில் ஆளும் தரப்புக்கும் எதிர்க்கட்சிகளுக்கும் இடையே கருத்து வேறுபாடு நீடித்து வரும் நிலையில், டெல்லியில் நடைபெற்ற இந்த போராட்டமும் கைது நடவடிக்கையும் அரசியல் வட்டாரத்தில் கவனம் பெற்றுள்ளது.
